खोज

बुटवल,२ माघ । रुपन्देही ब्यापार संघको आगामी नेतृत्वका लागि वरिष्ठ उपाध्यक्ष डिल्लीराज भण्डारी र द्वितीय उपाध्यक्ष दिपक अधिकारीले पदाधिकारीमा प्यानल बनाएर उम्मेदवारी दर्ता गरेका छन् ।

माघ ५ गते शुरु हुने २२ औं वार्षिक साधारण सभा तथा १२ औं अधिवेशनबाट आगामी २ वर्षका नयां नेतृत्व चयन गर्न आज उम्मेदवारको मनोनयन भएको हो । भण्डारी २०५७ सालमा संघको कार्यसमिति सदस्यदेखि सचिव, महासचिव हुंदै वरिष्ठ उपाध्यक्ष भएर काम गरेका हुन् भने अधिकारी २०६६ सालमा संघले ब्यापार मेला आयोजना गर्दा उपसमिति सदस्य भएर संघमा सक्रिय हुन थालेका हुन् ।

नेकपा एमाले निकट व्यवसायीको वाहुल्य रहेको संस्थामा व्यवसायीहरु दुई प्यानलमा विभाजित भएर प्यानलै बनाएर चुनावमा होमिएपछि एमाले जिल्ला नेतृत्वलाई टाउको दुखाई भएको छ ।

संघको वरिष्ठ उपाध्यक्षमा प्रकाश ढकाल र महासचिवमा फर्सुराम पन्तको एकल उम्मेदवारी परेपछि उनीहरु निर्विरोध भए । अध्यक्षका उम्मेदवार भण्डारीको दावी अनुसार वरिष्ठ उपाध्यक्ष ढकाल र महासचिव पन्त उनको प्यानलका  हुन् ।

प्रथम उपाध्यक्षमा डिल्लीराजको प्यानलबाट दयानिधी भण्डारी र दीपकको प्यानलबाट ऋषिराम पाण्डे, द्वितीय उपाध्यक्षमा डिल्लीराजको प्यानलबाट नामदेव पाण्डे (विकास) र दीपकको प्यानलबाट प्रेमनाथ पाण्डे, कोषाध्यक्षमा डिल्लीराजको प्यानलबाट झविन्द्र अधिकारी र दीपकको प्यानलबाट मनिराम खनाल (मणि) , सचिवमा डिल्लीराजको प्यानलबाट मनहरी बस्याल र दीपकको प्यानलबाट मनिमदिन मिया,सहसचिवमा डिल्लीराजको प्यानलबाट प्रकाशराज पौडेल तथा दीपकको प्यानलबाट मेघनाथ पौडेल तथा सहकोषाध्यक्षमा डिल्लीराजको प्यानलबाट विनित भट्टराई र दीपकको प्यानलबाट अर्जुनप्रसाद भट्टराईको उम्मेदवारी परेको छ ।

२० मध्ये १६ जना कार्यसमिति सदस्यको लागि ३२ जनाको उम्मेदवारी परेको निर्वाचन समितिले जानकारी दिएको छ । चार जना कार्यसमिति सदस्यहरुमा हरि बहादुर सुनार , पुर्ण प्रसाद काफ्ले , तिलक आचार्य र कुल बहादुर बिसी निर्बिरोध भएका छन् । संघमा एक हजार पांच सय बढी मतदाता रहेको महासचिव दयानिधी भण्डारीले जानकारी दिए ।
अध्यक्षका उम्मेदवार भण्डारीले आफूले २०५७ सालदेखि संघका विभिन्न पदमा रहेर क्रमैसंग जिम्मेवारी पूरा गर्दै वरिष्ठ उपाध्यक्ष पदमा आउंदासम्म निरन्तर योगदान गरेका आधारमा अध्यक्षमा आफ्नो दावी विल्कूल स्वभाविक र न्यायोचित भएको बताए ।
‘मैले अध्यक्षमा दावी गर्न नहुने, नमिल्ने केही कारण छैन, बरु मेरो निर्विवाद छवि र काम अनि योगदानको आधारमा सर्वसम्मत बनाइनुपर्दथ्यो तर संस्थामा एकखालको अराजकता निम्ताउने, अग्रजको योगदानलाई बेवास्ता गरेर कसैलाई टपक्क टिपेर ल्याउने काम भएको छ, यसलाई व्यवसायीहरुले आफ्नो गोप्य मतमार्फत न्याय गर्नुहुनेछ भन्ने विश्वास छ’– भण्डारीले भने ।
अधिकारीले भने अब व्यवसाधिक संघ संस्थाहरू परम्परागत ढंगले नचल्ने हुँदा संघको नेतृत्व युवा पंक्तिमा जानु अहिलेको आवश्यकता भएकोले आफुले अध्यक्षमा दावी गरेको बताउछन्।