खोज

बुटवल,२४ पुस । निजी विद्यालयहरु गुठीमा जान तयार नभएको बरु सरकारलाई ताला चाबी बुझाएर बन्द गर्ने चेतावनी दिएका छन् ।
सरकारले बनाउन लागेको नयां शिक्षा ऐनमा निजी विद्यालयहरुलाई गुठीमा लैजाने गरी विधेयकको मस्यौदा बनेको छ । तर सरकारले निजी विद्यालयहरुमाथि भेदभावपूर्ण र सौतेलो ब्यवहार गर्दै जबरजस्ती गुठी अन्तर्गत लैजान खोजे देशभरका निजी तथा आवासीय विद्यालयका तालाचाबी सरकारलाई बुझाएर बन्द गर्ने प्याब्सनका केन्द्रीय उपाध्यक्ष विष्णु पन्थीले बताए ।

प्याब्सन रूपन्देहीको २० औं साधारण सभा तथा ३२ औं प्याब्सन दिवसको अवसरमा आयोजित कार्यक्रममा उपाध्यक्ष पन्थीले निजी विद्यालयहरुलाई विगतमा राज्यले नै कम्पनी ऐन अन्तर्गत सञ्चालन गर्न अनुमति दिएकाले गुठीमा जान तयार नभएको स्पष्ट पारे । उपाध्यक्ष पन्थीले विश्व विद्यालयको खस्कंदो शैक्षिक गुणस्तर, परीक्षा र नतिजाको निश्चित समय तालिका अभावमा विद्यार्थीहरु उच्च शिक्षाका लागि विदेश पलायनको समस्या बढेको बताए । विद्यार्थीको पलायनमा सरकारकै कमजोरी भएको उपाध्यक्ष पन्थीले बताए ।

अभिभावक महासंघ नेपालका केन्द्रीय सदस्य लोकनाथ ज्ञवालीले निजी विद्यालयहरूमा सरकारको ठूलो लगानी हुंदाहुंदै विभिन्न शिर्षकमा शुल्क लिनु नाजायज भएको बताए । उनले शुल्कमा एकरूपता र सरकारी नीति नियम पालना गर्नुपर्ने बताए ।
प्याब्सन रुपन्देहीका अध्यक्ष अनन्तराम शर्माले मुलुकको समग्र शैक्षिक गुणस्तरमा निजी विद्यालयको भूमिका महत्वपूर्ण भएपनि सरकारले सौतेलो व्यवहार गरेको गुनासो गरे । उनले गुठीमा जान वाध्य पारिए सरकारले सम्पत्ति मुल्यांकन गरेर भौतिक पुर्वाधार राष्ट्रियकरण गर्नुपर्ने बताए ।
कार्यक्रममा नेपाल पत्रकार महासंघ रुपन्देहीका अध्यक्ष रामराज पोख्रेलले उच्च शिक्षा अध्ययनका लागि विदेश जाने परिपाटी डरलाग्दो बनेकाले यसलाई रोक्न निजी विद्यालयले पनि भूमिका खेल्नुपर्ने बताए ।उनले अङ्ग्रेजी माध्यम र नाफा आर्जनलाई मात्र प्राथमिकता दिन नहुने भन्दै गुणस्तर बृद्धिमा प्राथमिकता दिनपर्ने र पब्लिकलाई सकारात्मक बनाउनुपर्ने सुझाव दिए ।

प्याब्सन प्रदेश अध्यक्ष लालहरी पाण्डे, पूर्व अध्यक्ष लेखनाथ पौडेल, पुस्तक तथा स्टेशनरी व्यवसायी महासंघ रुपन्देहीका अध्यक्ष रामकृष्ण चापागाई, प्याब्सन रुपन्देहीका उपाध्यक्ष कुलराज शर्मा , सचिव दीपक खनाल, कोषाध्यक्ष भोजराज पौडेलले बोल्दै आफ्नो हक हितका लागि आपसी एकतामा जोड दिएका थिए ।

कार्यक्रममा गत वर्षको एस ई ई मा ३.९ जिपिए ल्याउने न्यू होराइजनका इशा भुसाल र समीप अर्याल, अक्सफोर्ड माविका अभिषेक बेल्बासे र दर्शन खनाल , बुटवल पब्लिक स्कूलका वैभव क्षेत्री, होराइजन जीबिएसका सौगात न्यौपाने, प्रभात बोर्डिङ मुर्गियाका प्रशान्त भट्टराई, काशी नोबेल एकेडेमीका अमन बेल्बासे सहित विद्यालयका प्राचार्यहरु , उत्कृष्ट अंक हासिल गराउने विषय शिक्षकहरुलाई पनि सम्मान गरिएको थियो ।