खोज

 बुटवल,१८ पुस । गुल्मीमा पार्किङमा राखेको टेक्टरको डिजेल टंकीमा अज्ञात व्यक्तिले नुन राखिदिएपछि टेक्टर बिग्रिएर टेक्टर धनीले ठूलो क्षति ब्यहोर्नुपरेको छ । रुरु क्षेत्र गाउपालिका वडा नंं ४ चौतारामा पार्किङमा राखेको लु ४ त ५५७ नम्बरको टेक्टरको डिजेल टंकीमा अज्ञात व्यक्तिले नुन खन्याइदिएपछि टेक्टर स्टार्ट नहुने भएको टेक्टरधनी माधव खड्काले बताए ।

टेक्टर स्टार्ट नभएपछि राजेन्द्र श्रेष्ठको ट्रकमा राखेर बुटवल मैनाबगर अटो भिलेजस्थित देवसिद्ध अटोमोबाइल्स प्रालिमा ल्याएर चेकजांच गर्दा कसैले डिजल टंकीको ढक्कन खोलेर कम्तीमा एक पोका नुन खन्यादिएको पाइएको खड्काले बताए । देवसिद्ध अटोमाबाइल्स प्रालिका सञ्चालक कमल अर्यालले नुनले टेक्टरको डिजल टंकीमा ठूलो क्षति पुराएको र पुरानै अवस्थामा ल्याउन करिब डेढलाख रुपैयां लाग्ने बताए । ट्रकमा राखेर ल्याउंदा पनि हजारौं खर्च भएको खड्काले बताए ।

योजनावद्ध ढंगले गरीखाने साधन बिगारिदिने घटनामा संलग्न व्यक्तिलाई पहिचान गरी कानून वमोजिम कारवाही गरी न्याय दिन खड्काले छानवीनको माग गर्दै प्रहरीमा निवेदन दिने बताए । आगामी दिनमा यस्तो बद्मासी र आपराधिक काम कसैलाई गर्न नदिन प्रहरीले दोषीलाई पत्ता लगाई कारवाही गर्नेमा आशावादी रहेको खड्काले बताए ।