खोज

बुटवल,१७ पुस । लुम्बिनी एक्स्पोमा सञ्चालित डान्स आइडल प्रतियोगिताको उपाधि आकृति परियारले जितेकी छन् । रुपन्देही ब्यापार संघको आयोजनामा पुस ५ गतेदेखि सञ्चालित यो प्रतियोगिताको फाइनलमा मंगलबार तीन जनाबीच उपाधिको  प्रतिष्पर्धा भएको थियो । फाइनलमा अन्य दुई प्रतिष्पर्धीलाई पछि पार्दै बुटवलको नवीन औद्योगिक मावि देवीनगरमा कक्षा ११ मा अध्ययनरत आकृतिले उपाधि जितेकी हुन् । उपााधिसंगै उनले एक लाख एक हजार रुपैयां नगद पुरस्कार र विभिन्न उपहार पाएकी छन् । यस्तै आरोही काउचा दोस्रो भएकी छन् । आरोही कान्ति मावि बुटवलमा कक्षा ९ मा अध्ययनरत छात्रा हुन् । उनले नगद र ५० हजार प्राप्त गरेकी छन । यस्तै सतिष सेन्चुरी तेस्रो हुंदै २५ हजार नगद पुरस्कार पाए । उनी केबी डान्स कला केन्द्र देवीनगरका प्रशिक्षार्थी हुन् ।
प्रतियोगितामा ५५ जनाले भाग लिएका थिए । जसमध्ये अडिसनबाट २७ जना छनोट भए र ती मध्ये १२ जना भोटिङ राउण्डमा आएका थिए । १२ जना मध्ये निर्णायकको मूल्यांकन ५० अंक र दर्शकले दिने भोटको ५० अंकका आधारमा हरेक दिन एक–एक जना प्रतियोगी बाहिरिंदै जांदा अन्तिम तीनजनाबीच उपाधि भिडन्त भएको हो । उत्कृष्ट १० जनामा सायना रम्तेल,ट्वीङ्कल श्रेष्ठ,बिहानी थापा,किन्जल मल्ल,सतिश सेन्चुरी,आरोही काउचा,निसिम झेडी,आकृति परियार,सौजन्या कार्की र किरण भण्डारी छनोट भएका थिए । यो प्रतियोगितालाई प्योर स्यानिटरी प्याडले प्रायोजन गरेको थियो ।
विजयी प्रतियोगीहरुलाई रुपन्देही ब्यापार संघका अध्यक्ष कृष्णप्रसाद घिमिरे,सांस्कृतिक कार्यक्रम संयोजक प्रकाशराज पौडेल लगायतले पुरस्कार प्रदान गर्दै नृत्य प्रतिभाहरुको कला प्रष्फुटन गर्ने प्लेटफर्म दिन डान्स आइडल प्रतियोगितालाई निरन्तरता दिइएको बताए ।

प्रतियोगिताको संयोजकमा लोकेन्द्र शाह तथा निर्णायकहरुमा सुन्दर गुरुङ,मिना बुढाथोकी र सुमन पौडेल थिए ।
यस्ता प्रतियोगिताले स्थानीयस्तरमा थुप्रै राम्रा कलाकारहरु जन्माइसकेको र उनीहरु अहिले ख्यातिप्राप्त डान्सर,म्युजिक भिडियोमा मोडेल र नृत्य प्रशिक्षकसम्म भएर राम्रो आय आर्जन गर्न सफल भएका छन् ।

एक्स्पोमा आयोजित विद्यालयस्तरीय लोकनृत, लोक दोहोरी, भजन र र्याप गीत प्रतियाोगिताहरुको पनि फाइनल प्रतिष्पर्धा सम्पन्न भइसकेको र भोलि बुधबार मेला समापन हुने एक्स्पोका प्रचार प्रसार संयोजक फर्सुराम पन्तले बताए । समापन समारोहमा उत्कृष्ट स्टलहरुलाई पुरस्कृत गरिने छ ।