खोज

बुटवल,१४ पुस । पेट्रोलियम पदार्थ ढुवानी गर्ने टेंकर व्यवसायीहरुले समय सापेक्ष ढुवानी भाडा दर समायोजन गर्न सरकारसंग माग गरेका छन् । पश्चिमाञ्चल टेंकर व्यवसायी समितिको १६ औं वार्षिक साधारण सभामा बोल्दै उनीहरुले नेपाल आयल निगमले बटम लोडिङ प्रणालीबाट ढुवानी गर्नुपर्ने प्रावधान लागु गर्दा व्यवसायीको प्रति टेंकर लाखौं अतिरिक्त खर्च हुने भएकाले भाडा दर समायोजन नगरे व्यवसायी संकटमा पर्ने बताए ।
सो अवसरमा नेपाल आयल निगम प्रादेशिक डिपो भलबारीकी प्रमुख कमला न्यौपानेले वातावरणीय संरक्षण र ढुवानीका क्रममा हुने नोक्सानी रोक्न इण्डियन आयल कर्पोरेसनले यो प्रणाली अनिवार्य गरेकाले नेपाल आयल निगमले पनि लागु पर्ने वाध्यता रहेको बताइन् । उनले व्यवसायी र सरकार सहकार्य र समन्वय गरेर अघि बढे मात्रै आपुर्ति सहज हुने बताइन् ।
टेंकर व्यवसायी महासंघ र निगमबीच वार्ता र संवादबाट यो समस्याको निकास निकाल्न सकिने उनले बताइन् ।
कार्यक्रममा पश्चिमाञ्चल टेंकर व्यवसायी समितिका प्रमुख सल्लाहकार चोपनारायण श्रेष्ठले आर्थिक मन्दी, चर्को बैंक ब्याज दरको मारमा परेका व्यवसायीलाई भाडा समायोजन नगरी बटम लोडिङ प्रणालीमा जान कठीन हुने बताए । बटम लोडिङमा जांदा एउटा टेंकरमा २० लाख रुपैयां बढी अतिरिक्त खर्च हुने श्रेष्ठले बताए ।
उनले व्यवसायिक एकताले मात्रै व्यवसायीले उठाएका माग सम्बोधन गराउन सरकारलाई दबाव दिन सकिने बताए ।
समितिका अध्यक्ष राधेश्यम कसौधन,पश्चिमाञ्चल पेट्रोलियम डिलर्स एशोसिएसनका अध्यक्ष हिमाल गैरे,समितिका महासचिव भुपराज अर्याल,सहमहासचिव प्रेम जीएम,कोषाध्यक्ष धनेन्द्र पौडेल,शान्तकुमार शर्मा लगायतले चर्को बैंक ब्याज दर आर्थिक मन्दी जस्ता कारणले व्यवसायीहरु संकटमा परेकाले उनीहरुका माग प्रति सरकार संवेदनशील हुनुपर्ने बताए ।