खोज

काठमाडौं,८ पुस । नेकपा एमालेका अध्यक्ष केपी शर्मा ओलीले ट्रंकलाइन र डेडिकेटेड फिडरको महसुल नतिरेको नाममा उद्योगको लाइन काट्न नहुने बताएका छन् ।

आइतबार काठमाडौंमा आयोजित पत्रकार सम्मेलनमा ओलीले उद्योगी व्यवसायीले आफूलाई पनि ज्ञापन पत्र दिएको भन्दै डेडिकेटेड फिडर र ट्रंकलाइन जोडे पनि त्यस अनुसार विद्युत नदिएको तर महसुल मात्र बढी लिएको भन्दै त्यो गलत भएको बताए ।

अहिले उद्योगी व्यवसायी आर्थिक समस्याका कारण तड्पिरहेको भन्दै भन्दै अध्यक्ष ओलीले उद्योगहरु आफै बन्द हुँदैछन्, झन् सरकारले नै लाइन काटेर उद्योग बन्द गरिदिनु गलत भएको बताए ।
डेडिकेटेड र ट्रंकलाइन विवादलाई संवादमार्फत हल गर्न पनि उनले सरकारलाई आग्रह गरे ।
नेपाल विद्युत प्राधिकरणले २०७३ सालअघि लोडसेडिङ हुँदा उद्योगहरुलाई डेडिकेटेड फिडर र ट्रंकलाइनमार्फत बिजुली आपूर्ति गरेको थियो ।

तर उद्योगी व्यवसायीले प्राधिकरणले थाहै नदिई डेडिकेटेड र ट्रंकलाइनको बिजुली जोडेको र महंगो महसुल असुल्न खोजेको भन्दै उक्त समयको महसुल तिर्न अस्वीकार गरेका छन् ।

नेपाल विद्युत प्राधिकरणले भने डेडिकेटेड र ट्रंकलाइनको महसुल नतिर्ने उद्योगको लाइन काट्ने चेतावनी दिंदै ४ वटा उद्योगको लाइन काटिसकेको छ ।

केही दिनअघि प्रधानमन्त्री प्रचण्डले पनि त्यस्ता उद्योगको लाइन काट्न निर्देशन दिएपछि उद्योगी व्यवसायीले विरोध गर्दै आएका छन् ।