खोज

दाङ, १ पुस ।

दाङमा टिप्परको ठक्करबाट मोटरसाइकलमा सवार प्यूठानका दुई किशोरको मृत्युपछि उत्पन्न तनाव छलफलपछि सहमतिमा टुँगिएको छ । आइतबार बिहान जिल्ला प्रशासन कार्यालय दाङमा पीडित पक्ष र ट्रक समितिका बिचमा मृतक दुई किशोरका आफन्तलाई क्षतिपूर्ती बापत जनही साढे ६ लाख क्षतिपूर्ती उपलब्ध गराउने तथा ट्रक धनीले नयाँ मोटरसाइकल किनेर दिने सहमति भएको हो ।

मृतक दुवैको शव प्यूठानस्थित घरसम्म पुर्याइदिने र दुर्घटनापछि क्षतिपूर्तीका लागि प्यूठानबाट दाङ आएका मानिस तथा आफन्तलाई पनि घर सम्म छोड्ने बन्दोबस्त ट्रक समितिले नै गर्ने सहमति कायम भएको छ ।

सहमति कायम भएपछि उत्पन्न विवाद समाधान भएको झिमरुक गाउँपालिकाका उपाध्यक्ष प्रमोद पोखरेलले जानकारी दिए । सहमतिपछि आफुहरु शवहरु लगेर जिल्ला फर्कने तयारी गरिरहेको उपाध्यक्ष पोखरेलले बताए ।

प्यूठानको झिमरुक गाउँपालिका – ४ बाङ्गेका १७ वर्षीय विशाल जिसी र नौंबहिनी गाउँपालिका – ६ लुङका १८ वर्षीय सागर केसीको शुक्रबार राति उपचारका क्रममा राप्ती स्वास्थ्य विज्ञान प्रतिष्ठान घोराहीमा मृत्यु भएको थियो । दुर्घटनापछि मृतक दुबै जनाको शव प्रतिष्ठानमै राखिएको छ ।

तुलसीपुरबाट घोराही तर्फ जाँदै गरेको रा १ क १३०७ नम्बरको टिप्परले घोराहीबाट तुलसीपुरतर्फ आउँदै गरेको रा २ प ५५८९ नम्बको मोटरसाइकललाई घोराही उपमहानगरपालिका – १० झारबैरा चोकमा शुक्रबार राति ठक्कर दिएको थियो ।

गाउँपालिकाका उपाध्यक्ष पोखरेलले उचित क्षतिपुर्ती र न्यायको माग गर्दै शनिबार बेलुका नै आफुहरु दाङ आइ प्रहरी प्रशासन र ट्रक धनीसंग छलफल गर्न खोजेपनि बेवास्ता गरेका कारण आइतबार बिहानैदेखि सडक बन्द गर्नु परेको बताएका थिए ।

पीडितको आवाज कसैले नसुनेपछि बिहान सात बजेदेखि घोराहीस्थित तुलसीपुर चोकमा यातायात अवरुद्ध गर्न बाध्य भएको र त्यही क्रममा प्रहरीले आफुहरुलाई जबर्जस्ती उठाएर लगेको उनले बताएका थिए ।

जिल्ला प्रहरी प्रमुख एसपी रामबहादुर केसीले दुर्घटनापछि ट्रक चालकलाई नियन्त्रणमा लिइसकेको अवस्थामा बिमा बापत स्वतः क्षतिपुर्ती उपलब्ध हुने ब्यवस्था विपरित जबर्जस्त सार्वजनिक सवारी बन्द गर्न खोजेपछि आन्दोलनमा उत्रिएकाहरुलाई वार्ताको लागि लगिएको जानकारी दिएका थिए ।