खोज

बुटवल,१ पुस । नेकपा एमालेका नेता डा.रामप्रसाद बस्याल पुर्व राजा ज्ञानेन्द्र शाहलाई भैरहवामा अभिनन्दन मूल समितिको संयोजक बनेका छन् । पुर्व राजा ज्ञानेन्द्र यही पुस १५ भित्र भैरहवा आउने तयारी छ । भैरहवाका पुराना वामपन्थी नेता बस्याल एमालेका पुर्व प्रदेश कमिटी सल्लाहकार हुन् । उनी गत स्थानीय निर्वाचनमा नगर प्रमुख पदमा उम्मेदवार बनेका थिए ।
शुरुमा ततकालीन नगर सचिव नारायणप्रसाद भण्डारीलाई टिकट दिने निश्चित भएपनि रातारात निर्णय उल्टाएर बस्याल उम्मेदवार बनेका थिए । डा. बस्यालले आफूले एमाले छाडिनसकेको तर धर्म निरपेक्षता र प्रदेश संरचनाका विषयमा पार्टीसंग अुहमत रहेको बताए । ‘धर्म निरपेक्षता र प्रदेशसहितको संघीयताप्रति जनता सहमत छैनन्, विरोधमा छन्’–बस्यालले भने– ‘यी दुई एजेण्डामा म पनि पार्टीसंग सहमत थिइन, देश बचाउन पुर्व राजाले गर्ने राम्रा काममा मेरो समर्थन रहन्छ ।’
नेता बस्यालले भैरहवामा पुर्व राज्ञा ज्ञानेन्दलाई अभिन्दन गर्न आयोजना गरिने सभामा ३० हजार भन्दा धेरै नागरिक उतार्ने तयारी भइरहेको बताए । एमालेबाट मेयरको उम्मेदवार बनेका बस्याल ७ हजार ३ सय ५ मत पाएर पराजित भएका थिए । कांग्रेसका इस्तियाक अहमद खानले मुख्य प्रतिस्पर्धी राप्रपाका सागर प्रताप राणा र बस्याललाई पराजित गरेका थिए ।
नेकपा एमाले रुपन्देहीका सचिव यज्ञ गैरेले गत स्थानीय चुनावमा एमालेले मेयरको टिकट दिएका बस्याल अहिले पार्टीको कार्यकारी जिम्मेवारीमा भने नरहेको बताए । पुर्व राजाको अभिनन्दन समिति संयोजक बनेको विषयमा पार्टीभित्र छलफल गरी आवश्यक निर्णय लिइने सचिव गैरेले बताए । आफूले पाएको टिकट खोसेर बस्याललाई दिएको भन्दै असन्तुष्ट एमाले सिद्धार्थनगरका सचिव नारायणप्रसाद भण्डारीले पनि पार्टी छाडिसकेका छन् ।