खोज

सुर्खेत, २८ मंसिर ।

फिरन्ते जीवनशैली बिताउँदै आएका राउटे समुदायमा नेपाल प्रहरी श्रीमती संघले स्वास्थ्य शिविर सञ्चालन गरेको छ । शिविरमा राउटे समुदायको स्वास्थ्य परिक्षण गरिएको संघले जनाएको छ ।

दैलेखको भैरबी गाउँपालिका वडा नम्वर ५ मा रहेको राउटे बस्तीमा पुगेर नेपाल प्रहरी श्रीमती संघले स्वास्थ्य शिविरसँगै न्यानो कपडा वितरण पनि गरेको छ । यस्तै राउटे समुदायका एक सय ४१ जनालाई न्यानो कपडा समेत वितरण गरिएको छ । सेवाभावले अग्रपंक्तिमा अग्रसर हुनुका साथै मानवीय सेवा प्रदान गर्दै आइरहेको संघका केन्द्रीय अध्यक्ष लक्ष्मी कुँवरले जानकारी दिइन् ।

राउटे समुदाय पनि समाजको हिस्सेदार समुदाय भएको हुँदा शिविरको आयोजना गरिएको उनले बताइन् । ‘मौसम परिवर्तन सँगै जाडो मौसमको सुरूवात भइरहेको अवस्थामा उनीहरुलाई न्यानो कपडा वितरण गरेका छौ’ कुँवरले भनिन्, ‘राउटे समुदायको फरक जीवनशैली र पुरा शरीर ढाक्ने लुगा कपडा नलगाउने चलनका कारण चिसोबाट बच्न कम्बल समेत वितरण गरेका हौ ।’

सल्लाको दियालो बालेर उद्घाटन गरिएको कार्यक्रममा स्वास्थ्य शिविर आयोजनाको लागि सहयोग गर्ने स्वास्थ्यकर्मीहरुलाई प्रशंसा पत्र प्रदान समेत प्रदान गरिएको छ ।

निःशुल्क स्वास्थ्य शिविर तथा न्यानो कपडा वितरण कार्यक्रममा नेपाल प्रहरी श्रीमती संघ अध्यक्ष लगायतमहासचिव अनुश्री पाख्रिन, केन्द्रीय कार्यसमिति सल्लाहकार निलम कडायत, सह–कोषाध्यक्ष कमला खनाल, संघका कर्णाली प्रदेश अध्यक्ष बिन्दु अधिकारी ढकाल, कर्णाली प्रदेश प्रहरी प्रमुख प्रहरी नायव महानिरीक्षक भिमप्रसाद ढकाललगायतको सहभागिता रहेको थियो ।