खोज

चन्द्रौटा (कपिलवस्तु), २४ मंसिर । कपिलवस्तुकोे शिवराज नगरपालिका–५, चन्द्रौटामा रहेको ट्राफिक प्रहरीले सक्रियता देखाएको छ । चन्द्रौटा ट्राफिक पोष्टका इन्चार्ज तथा प्रहरी नायब निरीक्षक दामोदर मल्लको नेतत्वमा व्यापारीक केन्द्रमा रहेको बजार सौन्दर्यकरण गर्नका लागि सवारी पार्र्किङ, जेब्रा क्रसिङ, लाइन, ठेला लगायतलाई उचित व्यवस्थापन गर्न ट्राफिक प्रहरीले सक्रियता देखाएको जनाइएको छ । मल्लले भने ः“सडक पर्याप्त भएपनि व्यवस्थापन नहँुदा कुरूप देखिएको थियो । अब सुधार ल्याउने प्रयास गरेका छौँ ।”
शिवराज नगरपालिका र सडक डिभिजन शिवपुरको समन्वयमा सवारी र आम नागरिकको चाप बढी भएको स्थानको सडकको बीच भागमा मार्किङ गरिएको निरीक्षक मल्लले जनाए । चन्द्रौटा बजार क्षेत्रमा यातायात र पार्किङलाई व्यवस्थापन गर्न सडक मार्किङ गर्ने काम थालिएको मल्ल बताउँछन् ।

बढ्दो ट्राफिक समस्याले स्थानीय बासि र पैदल यात्रु निकै समस्यामा परेको गुनासो आएकोले ट्राफिक नियमलाई थप व्यवस्थापन गर्न सक्रियता जनाएको छ । दैनिक जसो हुने साना ठुला दुर्घटनालाई नियन्त्रण गर्न चन्द्रौटा ट्राफिकले चेकजाचलाई समेत कडाइ गरिएको मल्लको भनाइ छ ।
तिब्र ध्वनिमा दौडने मोटरसाइकल पुर्ण रूप नियन्त्रण लिएको मल्लले बताए । लुम्बिनी प्रदेशको राजधानी नजिक रहेको यो बजारलाई थप व्यवस्थित बनाउन सबैको सहकार्य आवश्यक रहेको उनले जोडदिए ।

ट्राफिक प्रहरीका अनुसार अत्यन्तै साँघुरा सड्क, बढ्दो सवारी चाप, पैदल यात्रुको जथाभावी सड्क काट्ने बानी लगायत कारणले सडक दुर्घटना जोखिम बढेको छ । बढ्दो ट्राफिक जाम नियन्त्रणको लागि जेब्रा क्रसिङ र लाइन मार्किङ गर्ने कार्यलाई तिब्रता दिएको ट्राफिक प्रहरीले जनाएको छ । नगरपालिकाका नगर प्रमुख अजय थापाले बजार व्यवस्थापन गर्न नगर प्रतिबद्ध रहेको बताए । स्थानिय प्रहरी, सडक डिभिजन लगायत सम्बन्धित निकायसँग समन्वय गरी कार्य गरेको जिकिर गरे ।

ट्राफिक प्रहरीले यतिबेला गरेको कार्य सराहनिय रहेको प्रशांसा गर्दै बजार सौन्दर्य देखिनुको साथै सवारी साधन समेत व्यवस्थित पार्किङ हुँदा आम नागरिकलाई किनमेल गर्न देखि लिएर बजारको मुहार नै फेरिएको स्थानिय व्यवसायी गोपाल प्रसाद बन्जाडेले बताउँछन् । जेब्रा क्रसिङ हुँदा बजार सुन्दरतासँगै पैदलयात्रुलाई आवत जावत गर्न समेत सहजता भएको स्थानीय गणेश थारुले बताए ।