सामग्री खोज्नुहोस्

बुटवल, १६ मंसिर । नेपाली कांग्रेसका नेता डा. शेखर कोइराला र महामन्त्री गगन थापाले आगामी निर्वाचनमा नेपाली कांग्रेस वडादेखि आम चुनावसम्म एक्लै प्रतिस्पर्धा गर्नुपर्ने बताएका छन् ।

पार्टीको प्रथम लुम्बिनी प्रदेश अधिवेशनलाई सम्बोधन गर्दै नेता कोइराला र थापाले एक्लै चुनाव लड्न अहिल्यैबाट तयारी थाल्न नेता कार्यकर्तालाई आग्रह गरे ।
‘अब आगामी चुनावमा वडादेखि संघसम्म कांग्रेस एक्लै चुनाव लड्न पर्छ,आजैदेखि तयारी सुरु गर्नुस्’–नेता कोइरालाले भने–‘एक्लै चुनाव लड्न कांग्रेस एक ढिक्का हुनुपर्छ, कांग्रेस एक ढिक्का भए कसैको सहारा लिनुपर्दैन ।’ २०८४ को चुनाव जित्न पार्टीको महाधिवेशन २०८२ भित्र सक्नुपर्ने कोइरालाको भनाइ छ ।

नेता कोइरालाले कांग्रेस परिवर्तन भएमात्र देश परिवर्तन हुने बताए । गौतमबुद्धको उदाहरण दिंदै कांग्रेस परिवर्तन हुन नेताहरुले त्याग गर्न सक्नुपर्ने र उग्र महत्वाकांक्षा र खराब आचरण त्याग्न जरुरी रहेको बताए ।

त्यागले मात्रै नयां नेपाल र नयाँ नेपाली कांग्रेस बन्ने कोइरालाको भनाइ छ । मुलुकमा भ्रष्टाचार र दण्डहीनता बढेको बढ्यै गरेको भन्दै कोइरालाले सुशासन र पारदर्शिता कायम नभएसम्म कांग्रेसले विश्राम लिन नहुने बताए ।

राजनीतिज्ञ, उद्योगी–व्यापारी, कर्मचारीको मिलेमतोमा देशमा भ्रष्टाचार मौलाएको नेता कोइरालाले दावी गरे । बैंक सञ्चालक र उद्योगी ब्यापारी एउटै घरानाका हुँदा नेपालको अर्थतन्त्र समस्यामा परेको र बैंक ब्याजदर चर्को भएको नेता कोइरालाले बताए ।

नेता कोइरालाले बैंकहरु सबैभन्दा ठूला मिटरब्याजी भएको आरोप लगाए ।
कृषि उत्पादन बढाउन सके मात्रै रोजगारी सिर्जना हुने र आत्मनिर्भर अर्थतन्त्र हुने भन्दै उनले युवा पलायन रोकेर स्वदेशमै ४०–५० हजार कमाउने वातावरण बनाउनेतर्फ सबैको ध्यान जानुपर्ने बताए ।
कार्यक्रममा नेपाली कांग्रेसका महामन्त्री गगन थापाले पनि चुनाव अघिको गठबन्धनले लोकतन्त्रलाई विकृत बनाएको बताउंदै आउदो च्ुनावमा कांग्रेस एक्लै चुनाव लड्नु्पर्नेमा जोड दिए । समानुपातिक निर्वाचन प्रणालीले पनि विकृति ल्याएको भन्दै उनले यसबारे पनि संसदीय समितिमा गहन छलफल गरी कानून संशोधन गर्नुपर्ने बताए ।
मिश्रित निर्वाचन प्रणालीमा कुनै दलको एकल वहुमत आउंदैन भन्ने कुरा सत्य नभएको भन्दै दल सञ्चालन र नेतृत्वमा समस्या भएकाले वहुमत आउन नसकेको बताए ।
पार्टीको संसदीय समितिले सांसदको टिकट बांड्ने परिपाटीले पार्टीमा गुटबन्दी मौलाएको भन्दै महामन्त्री थापाले सम्बन्धित क्षेत्र,पालिका र वडाबाट मतदान गरेर टिकट वितरण गरेमा पार्टी बलियो हुने तर्क गरे ।
माओवादीले जनयुद्धको नाममा अनावश्यक ढंगले १० वर्षे युद्धको भारी बोकाएर देशको अर्थतन्त्र कमजोर बनाएको थापाले बताए । २०४६ सालपछि उच्च ओहोदामा बसेका सबैको सम्पत्ति छानवीन गर्नुपर्ने बताएका छन् । नेपाली कांग्रेसको प्रथम लुम्बिनी प्रदेश अधिवेशनलाई सम्बोधन गर्दै उनले छानवीन गरेर अनियमित तरिकाले कमाएको भेटिए सम्पत्ति खोस्ने कानून बनाउनुपर्ने बताए ।
महामन्त्री थापाले प्रदेश सरकार महंगो भएको र ठीक ढंगले काम नगरेको जनस्तरमा गुनासो आएको बताए । प्रदेशदेखि संघसम्म धेरै मन्त्रालय हुंदा जनस्तरमा प्रदेशप्रति नकारात्मक टिप्पणी भएको बताए ।
प्रदेशलाई केन्द्रले अधिकार नदिंदा राम्रोसंग काम गर्न नसकेको भन्दै उनले मुख्यमन्त्रीलाई भन्दा सिडिओलाई बढी अधिकार भएको टिप्पणी गरे ।
‘लोभले गर्दा तलदेखि माथि सम्म सबैलाई मन्त्री बन्नुपरेको छ’–थापाले भने–‘मन्त्रालय घटाउनुपर्छ, संघमा ८देखि १० मन्त्रालय भए पुग्छ ।’
आफ्नो क्षेत्रमा टुक्रे वजेट पार्न मरिहत्ते गर्ने प्रवृत्तिले संघका मन्त्रीहरु र वडा अध्यक्षबीच फरक छुट्याउन कठीन हुन थालेको थापाको टिप्पणी छ ।