खोज

काठमाडौं,१५ मंसिर । अन्तर्राष्ट्रिय मुद्राकोष आईएमएफले चालू आर्थिक वर्षमा नेपालको आर्थिक वृद्धि ३ दशमलव ५ प्रतिशत हुने प्रक्षेपण गरेको छ ।

यो नेपालको आर्थिक वृद्धिको क्षमताभन्दा कमजोर भए पनि विद्युत उत्पादनमा वृद्धि हुने र पर्यटन क्षेत्रको पुनरुत्थानका कारण हासिल हुने आईएमएफले जनाएको छ । आईएमएफले नेपालमा मौद्रिक नीतिको प्रभावकारिता कमजोर भएको पनि जनाएको छ ।

खासगरी मूल्यवृद्धि नियन्त्रण गर्न र वित्तीय प्रणालीमा वासलातहरुलाई सुधार गर्न मौद्रिक नीति असफल रहेको विश्लेषण आईएमएफले गरेको छ । नेपाललाई दिएको विस्तारित क़र्ज़ा सुविधाको तेस्रो समीक्षा सम्पन्न गरेसँगै आईएमएफका उपप्रबन्ध निर्देशक बो लीले एक स्टेटमेन्ट जारी गर्दै यस्तो बताएका हुन् ।

मूल्य र बाह्य क्षेत्रको स्थायित्वका लागि विद्यमान सचेत र तथ्यांकमा आधारित मौद्रिक नीतिलाई भने कायमै राख्नुपर्ने सिफारिस पनि आईएमएफले गरेको छ । वित्तीय नीतिहरुमा अझै सतर्क रहनु आवश्यक रहेको आईएमएफले जनाएको छ । बलियो वृद्धिकेन्द्रित वित्तीय क्षेत्र सन्तुलन स्थापित गर्न र बुम बस्ट साइकल’ (आर्थिक विस्तार र संकुचनको छिटोछिटो दोहोरिइरहने प्रक्रिया)लाई रोक्न नियामकीय संरचना बनाउन केन्द्रित हुनुपर्ने पनि आईएमएफले सुझाव दिएको छ ।

ऋण दिने अभ्यास तथा सम्पत्तिको वर्गीकरणमा भएको सुधार उत्साहजनक भए पनि ठूला १० बैंकहरुको ऋण पोर्टफ़ोलियो समीक्षालाई निरन्तरता दिनु आवश्यक रहेको पनि आईएमएफले बताएको छ ।

नेपाल राष्ट्र बैंक ऐनको संशोधन गर्ने र राष्ट्रबैंकको बाह्य लेखापरीक्षकबाट लेखापरीक्षण गर्ने कामलाई प्राथमिकता दिनुपर्ने आईएमएफले सुझाव दिएको छ ।
नेपालले ईसीएफको तेस्रो किस्ताबापतको ६ अर्ब ८० करोड रुपैयाँ झिक्न पाउने भएको छ । नेपालले ईसीएफ कार्यक्रममा गरेको प्रतिबद्धताअनुरुपका सुधारमा उल्लेख्य प्रगति गरेको भन्दै आईएमएफले तेस्रो किस्ता भुक्तानीको स्वीकृति दिएको हो ।

आईएमएफको यो निर्णयसँगै नेपालले पाउने कुल रक़म ४९ अर्ब ७० करोडमध्ये २९ अर्ब ३७ करोड़ी भुक्तानी पाउने भएको छ । आईएमएफको बोर्डले ईसीएफअन्तर्गत ३७ करोड ६५ लाख अमेरिकी डलर दिने निर्णय १२ जनवरी २०२२ मा गरेको थियो ।