खोज

बुटवल, २६ कात्तिक ।

“तमु क्येए पोँले्, प्ये ताँ ल्हु ताँ ल्वोले” अर्थात गुरुङ भाषा बोलौ, संस्कार, संस्कृति सिकौ भन्ने मूल नाराका साथ सामाजिक संजाल टिकटक आइडी ग्रुपबाट प्रथम टिकटक लाइभ खुल्ला एकल तथा युगल नृत्य प्रतियोगिता भर्चुअल रुपमा सम्पन्न भएको छ ।

प्रतियोगितामा सहभागी ३५ जना प्रतियोगीहरुले मौलिक गुरुङ पहिरनमा गुरुङ भाषाका गितहरुमा आफ्नो नृत्य प्रस्तुत गरेका थिए । सहभागी प्रतियोगीहरु मध्ये प्रथम बाँझपाटन पोखराका देवि गुरुङ्ले नगद रु १५ हजार र प्रमाणपत्र, द्वितीय पोखरा–१३ चिसापानीका एर बहादुर गुरुङ र सकुन्तला गुरुङ्ले नगद रु १० हजार र प्रमाणपत्र, तृतीय सामूहिक नृत्यमा गोरखा अजिरकोट–४ भाँजेका सुनिता गुरुङ, रोजिना गुरुङ, सुष्मा गुरुङ्ले नगद रु ५ हजार र प्रमाणपत्र प्राप्त गरेका छन्

त्यसैगरी प्रोत्साहन स्वरुप सान्त्वना पुरस्कार काठमाडौका ओभि गुरुङ्ले नगद रु २हजार र प्रमाणपत्र त्यसैगरी भरतपुर–१५ चितवनका नारायण थिम्जे गुरुङ्ले नगद रु २ हजार र प्रमाणपत्र प्राप्त गरेका छन् । कार्यक्रम कात्तिक १८ गते शनिवार गरिने भनिएता पनि प्राविधिक कारणले २५ गते शनिबार साँझ ५.०० बजे देखि राति ११.३० बजे सम्म भर्चुअल रुपमा टिकटक आइडी @gurungbabita7 लाइभबाट भएको हो । गुरुङ नृत्य प्रतियोगितामा गुरुङ साँस्कृतिक अन्वेशक निर्देशक कृष्ण कुमार गुरुङ, स्टार्स फाउण्डेशन नेपालका अध्यक्ष, चलचित्र नृत्य निर्देशक कोरियोग्राफर जसु गुरुङ र नृत्य निर्देशक संघ रुपन्देहीका अध्यक्ष सुन्दर गुरुङले निर्णायकको भूमिका निर्वाह गरेका थिए ।

नृत्य प्रतियोगितामा अतिथिहरु कृष्ण कुमार गुरुङ, जसु गुरुङ, सुन्दर गुरुङ लगायतले सामाजिक सन्जाल बाट गरिने यस्ता कार्यक्रमहरुले भाषा संस्कार, संस्कृति सम्बद्र्धन र संरक्षण गर्न नयाँ पिंढीलाई सन्देश मिल्ने बताए । कार्यक्रममा ग्रुपका सल्लाहकार बौद्ध प्रसाद गुरुङ, ङोलो ङोल्स्यो ग्रुपका अध्यक्ष धन कुमारी गुरुङ र एल.जि एसोसिएशन बेलायतका सल्लाहकार एम. जे (महेन्द्र जङ) गुरुङ्, कार्यक्रम संयोजक बबिता गुरुङ्ले शुभकामना मन्तव्य राखेका थिए । सह–संयोजक कृष्ण गुरुङ र ग्रुपका सदस्य कुमार गुरुङले पनि आफ्नो धारणा राखेका थिए ।