खोज

बुटवल, २४ कात्तिक ।

मानव स्वस्थ रहन प्राकृतिक आयुर्वेद जीवनशैली अप्नाउनुपर्ने कामधेनु गौशालाका प्रमुख संरक्षक योगी सोमराज महाराजले सुझाव दिएका छन् । शरीरलाई उर्जा प्राप्त गर्न खाना आवश्यक हुने भए पनि वर्तमान जीवनशैलीमा खाएको पचाउन उर्जा खर्च हुने अवस्थाको कारण मानव अस्वस्थ बन्दै गएको उनले दाबी गरेका छन् ।

रोटरी क्लब अफ बुटवल डाउन टाउनको ९५७ औ नियमित बैठक तथा शुभ दिपावली तथा छ्ठ पर्वको शुभकामना आदाप्रदान कार्यक्रमलाई सम्बोधन गर्दै उनले आयु शब्दको अर्थ जीवन र वेदको अर्थ विज्ञानबाट आयुर्वेद उत्पन्न भएको बताए । निरोगी शरीर बनाउनु पहिलो सुख भएको भन्दै विचार, आहारबिहार, पंचतत्वको सन्तुलनबाट यो प्राप्त हुने उनले बताए । मानिसहरुको स्वस्थ्यप्रति खेलबाड भैरहेको भन्दै अहिलेको खानपिन मन्द विष भएको उनको जिकिर छ ।

मेटाबोलिज्मको कारण नै अहिले मानिसहरुमा दीर्घरोगहरु देखा परिरहेको उनले दाबी गरे ।
तितो र टर्रो बस्तु पाचन प्रकृयामा उपयुक्त हुने उनले सुझाव दिए । सुत्नेबेला शरीर आराम गर्ने समय भएको भन्दै सुत्नुभन्दा ३ घण्टा अघि कुनै पनि खाना सेवन लिन नहुने उनले बताए ।

मित्ररोग र सत्रुरोगका बारेमा ज्ञान लिन जरुरी रहेको उनले बताए । खाना पकाउदा प्रयोग हुने भाँडाकुडाले समेत नकारात्मक उर्जालाई बल गर्ने भन्दै भोजन पकाउदा गिल्टीमा पकाउनु ठिक नहुने बरु माटोमा पकाउनु सबैभन्दा उपयुक्त हुने उनको तर्क दिए ।

ऋतु अनुसार खानपानमा समेत ध्यान दिनुपर्ने तर्क दिदै उनले पित्त वृद्धि हुने बेला भएकाले अहिलेको अवस्थामा तितोटर्रो खानपान गर्नुपर्ने बताए । लक्ष्मी पुजाको एक दिनमात्र पुजा गरेर गाईहरु बचाउन नसकिने भन्दै उनले सबैको साथ सहयोग जरुरी रहेको उनले बताए ।

सडकका करीब ४ सय बढी छाडा चौपायालाई गौशालामा पालिरहेको उनले बताए । दूध नदिने गाई राखिएको ब्यवस्थित गौशालामा भलुही उत्कृष्ट भएको बताए । बैठकमा क्लबका अध्यक्ष कमला हमालले क्लबका सदस्यहरुको स्वस्थ्यबारे सचेत हुने गरि कार्यक्रम तयार गरेको बताईन ।

क्लबका पुर्व अध्यक्ष विमलराज भट्टराईले नेपाली धर्मसंस्कृति रहनसहन प्रकृतिमैत्री रहेको भन्दै यसको रक्षा गर्दै नया पुस्तामा लैजान जरुरी रहेको बताए ।

बैठकमा क्लबका सदस्य डिबि रायमाझीले आफू बैदेशिक कामको सिलसिलामा रोटरी अन्तर्राष्ट्रिय अन्तर्गत क्यानडाको क्लबमा बस्ने अवसर पाएको अनुभव सुनाए । रोटरीयन सदस्यको पहिचानसंगै एक आपसमा सम्मान आदर महत्वपूर्ण हुने र शिक्षा परियोजनामा सहकार्य गर्न चाहना ब्यक्त गरेको उनले बताए । रोटरी ईन्टरनेशनलका धेरै नेतृत्व पाएको क्लबमा आफू पुगेर अनुभव सिक्न पाएको उनले बताए ।

बैठकबाट पुर्वअध्यक्ष जीवन अधिकारीलाई डिजि सेलेक्सनमा पठाउने तथा जाजरकोटमा भुकम्प पीडितहरुलाई रोटरी डिष्ट्रिकमार्फत १ लाख १ हजार १ रुपैयाँ सहयोग गर्ने निर्णय भएको सचिव प्रकाशराज पौडेलले बताए ।

बैठकबाट पुर्वअध्यक्ष जीवन अधिकारीले सडक दुर्घटना अहिले ठूलो समस्या देखिएको भन्दै मंसिर ३ गते वृहत सचेतनामुलक कार्यक्रम गर्न लागिएको बताए ।