खोज

नवलपुर, २० कात्तिक ।

पुर्वी नवलपरासीको कावासोतीमा भूकम्पपीडितको सहयोगार्थ रक्तदान कार्यक्रम आयोजना गरिएको छ । जाजरकोट केन्द्रबिन्दु भएर शुक्रबार राति गएको भूकम्पमा परी घाइते भएका बिरामीहरूको उपचारका लागि सहयोग गर्न नेपाल विद्यार्थी संघ र नेपाल तरुण दल नवलपुर शाखाले खुला रक्तदान कार्यक्रम गरेका हुन् ।

जाजरकोट भूकम्पबाट भएको धनजनको क्षतिप्रति दुःख व्यक्त गर्दै बढ्दो रगतको अभाव परिपूर्ति गर्ने उद्देश्यले भूकम्पबाट घाइते भएकाको उपचारमा सहयोग गर्न रक्तदान गरिएको हो । रक्तदान कार्यक्रममा ३५ जनाले रक्तदान गरेको नेपाल विद्यार्थी सङ्घ नवलपुरका अध्यक्ष हरि सुवेदीले जानकारी दिए ।

“रगतको अभाव भएकाले हामीले पनि आफ्नो तर्फबाट त्यसलाई कम गर्न प्रयास गर्दैछौं । नवलपुरमा रहनुभएका विद्यार्थी, युवा, सर्वसाधारण सबै सहभागी भएको उनले बताए । नवलपुरको नेपाल रेडक्रस सोसाइटीको रक्त सञ्चार केन्द्रमा रगत सङ्कलन गरेको सुवेदीले जानकारी दिए ।

रगतको अभावले कसैले पनि ज्यान गुमाउन नपरोस् भन्ने सोचेर रक्तदान गरेको हुप्सेकोटका हुमन पाण्डेले बताए । आफ्नो सानो सहयोगले जीवन बचाउन सकिन्छ भने किन सहयोग नगर्ने, खेर जाने रगतलाई जीवनदान गर्नु हो, नेपाल विद्यार्थी संघ नवलपुर र नेपाल तरुण दल नवलपुर शाखाले गरेको यो कार्य सह्रानीय भएको नेपाली कांग्रेस नवलपुरका जिल्ला सचिब होमराज रानाभाटले बताए ।