खोज

बुटवल,२ कात्तिक । रोजगारमूलक सीपयुक्त प्राविधिक शिक्षा अहिलेको युगको आवश्यकता भएको शिक्षा क्षेत्रका सरोकारवालाले जोड दिएका छन् ।

रुपन्देहीे सैनामैनाको सालझण्डीस्थित पशुपति माविले आयोजना गरेको शुभकामना आदान प्रदान कार्यक्रमका वक्ताहरुले प्राविधिक शिक्षाले मात्रै विद्यार्थीलाई सीपयुक्त र रोजगार बनाउन सक्ने बताए ।
कार्यक्रमलाई सम्बोधन गर्दै सैनामैनाका नगर प्रमुख फणिन्द्र शर्माले रोजगारमूलक सीपयुक्त प्राविधिक शिक्षा अहिलेको युगको आवश्यकता भएको बताए । उनले विगतमा पशुपति माविको शैक्षिक गुणस्तर अब्बल भएपनि पछिल्लो समय खस्कदै गएको अवस्थामा अहिले नयां व्यवस्थापन समिति आएपछि फेरि सुधारको दिशामा जान थालेको बताए । उनले अब्बल सामुदायिक विद्यालयललाई नगरपालिकाले सहयोग गर्न तयार रहेको बताए ।
कार्यक्रममा विद्यालयका प्रधानाध्यापक हरिप्रसाद थापाले विद्यालयको शैक्षिक गुणस्तर अब्बल बनाउन अझै पनि भौतिक पुर्वाधारको कमी भएको उल्लेख गर्दै विद्यालयको आय स्रोत बढाउन नयां गुरुयोजना बनाउन लागेको बताए ।

कार्यक्रममा नगरपालिकाकी उप प्रमुख बीना राना,विद्यालय व्यवस्थापन समितिका अध्यक्ष हरिप्रसाद पोखरेल, नेपाली कांग्रेसका नेता नरेन्द्र सोमरे मगर, शिक्षक महासंघ सैनामैना नगर अध्यक्ष नारायण भुसाल,भूपू विद्यार्थी मञ्चका अध्यक्ष गोबिन्द पोखरेल, समावेशी टोल विकास संस्थाका अध्यक्ष गोबिन्द पोखरेल,सालझण्डी दुग्ध सहकारीका अध्यक्ष तिलकराम घिमिरे लगायतले बोल्दै नयां विद्यालय व्यवस्थापन समिति आएपछि विद्यालयको हरेक क्षेत्रमा सुधारको थालनी भएको धारणा राखेका थिए । सो अवसरमा अक्षयकोष दाता भगवती थापा र शान्ति वरालले अक्षयकोष घोषणा समेत गरेका थिए ।