खोज

यतिबेला सवैतिर दशैंको माहोल छ । संघीय राजधानी काठमाण्डौंबाट हरेक दिन दशौं हजारको संख्यामा दशैं मनाउन घर फर्किनहरूको लर्को छ । दशैंमा सहज यातायात्र सुविधा पाउने आशामा बसेका यात्रु अन्ततः बुटवल नारायणगड सडक खण्डको बिजोगले दुःख झेल्न बाध्य छन । पाँच बर्षदेखि उक्त सडक भएर यात्रा गर्नेहरूले दुःख र सास्ती पाईरहेका छन । दशैं मान्न घर फर्किनेहरू अहिले उक्त सडक खण्डको अवस्था देखेर निरास हुनुपर्ने अवस्था छ । आखिर नेपालमा यस प्रकारको चरम बेथिती कहिलेसम्म ? प्रश्न उठछ, तर सरकारसंगै यसको उत्तर छैन । निर्माण कम्पनीको दादागिरी छ । चारपटक त यो सडकको म्याद थपिएको छ तर पनि सडक निर्माण पूरा हुन सकेको छैन । नेपाललाई पूर्व र पश्चिमसंग जोडने महत्वपूर्ण मार्गका रूपमा बुटवल नारायणगढ सडक खण्ड रहेको छ तर यही सडक निर्माणमा बर्षौ लाग्ने जुन परिस्थिति सिर्जना भएको छ, यसले आम नेपालीलाई चिन्ता थपेको छ । यही नियति अरू राष्ट्रिय लोकमार्गको पनि हुने हो कि भन्ने आशंका उत्पन्न हुनु स्वाभाविक छ । नेपालमा कुनैपनि विकास निर्माणको काम समयमा नै सम्पन्न नहुने ठूलो समस्याको रूपमा रहेको छ । बुटवल नारायणगढ सडकखण्ड पनि यसबाट अछुतो रहन सकेन । जुन गतिमा निर्माण कार्य हुनुपर्ने हो त्यो नहुँदा यात्रुले मात्र होइन, पर्यटकहरूमा समेत गलत सन्देश जाने अवस्था आउन सक्छ । सडक विस्तार आयोजनाको हेलचेक्र्याइँ र लापरबाहीको कारण यात्रुले घण्टौं विताउनु पर्ने अवस्था छ । सडक निर्माणको क्रममा सरकारी अनुगमन पनि सुस्त छ ।

बुटवल–नारायणघाट सडकखण्ड पानी परेको बेलामा अवरुद्ध समेत हुँदै आएको छ । जसका कारण यातायात सञ्चालनमा समेत असहज अवस्था छ । यो मार्ग अवरुद्ध हुने गरेका कारण भगवान गौतमबुद्धको जन्मस्थल लुम्बिनीदेखि चितवनको पर्यटकीय क्षेत्र सौराहामा समेत असर परेको छ । काठमाडौं जाने आन्तरिक एवं बाह्य पर्यटकहरूका लागि अन्य वैकल्पिक मार्गहरू त्यति सहज देखिँदैनन् । त्यसैले अन्य मार्ग प्रयोग गरी आवतजावत गर्नेहरूले पनि कष्टकर यात्रा गर्नुपर्ने बाध्यता छ । त्यसैले यात्रुलाई सुलभ र सहज यात्रा गराउने सरकारको कर्तव्य मात्र नभएर दायित्व पनि हो । उक्त सडक भएर जाने पर्यटकीय स्थलमा पर्यटकको संख्यामा समेत कमी आएको छ । यसमा सरकार समेत दोषी छ । निर्माण सम्बद्ध कम्पनीलाई समयमा निर्माण सम्पन्न गर्न ताकेता नगर्नुको पछिको कारणको सरकारले जवाफ दिनुपर्दछ । निर्माण कम्पनीले यो सडक समयमै पूरा नगर्नुको कारण के हो ? कसले जवाफ दिने ? निर्माण कम्पनीको म्याद पटकपटक थप गर्नुपर्ने अवस्था किन आउँछ ? यो सवैको पछिको रहस्य र कारणमाथि बिहंगमरूपमा खोजी गर्नु जरुरी छ । अहिले दशैंको मौसम छ । दशैंमा सहज यात्राको आशा राखेका यात्रु सडककै कारण सास्ती सहन बाध्य भएका छन । यस प्रकारको कछुवा गतिको निर्माणले नेपालको विकास कहिलेसम्म होला ? सरकारसंग नै यसको जवाफ छैन । अव ढिलाई नगरि सडक निर्माणका लागि सरकारले ताकेता गरोस् । पटकपटक म्याद थप गरेर निर्माण कम्पनीलाई ढिलाईमा प्रश्रय दिने काम सरकार आफैले गर्दै आएको छ । सडक निर्माणमा भएको ढिलासुस्तीले सिमा नाघेको हुँदा अव फेरीपनि ढिलाई गर्ने निर्माण कम्पनीलाई दण्डित गरियोस् ।