खोज

दाङ, २६ असोज ।

गौमाता रक्षाका लागि घोराहीमा महायज्ञ सञ्चालन हुने भएको छ । श्री योगी आदित्यनाथ फाउण्डेशनको आयोजनामा यही असोज २८ गतेदेखि कात्तिक ५ गतेसम्म घोराहीमा महायज्ञ सञ्चालन हुने भएको हो । श्री योगी आदित्यनाथ फाउण्डेशनले तुलसीपुर उपमहानगरपालिका १७ मा सञ्चालन गरेको गौशाला व्यवस्थापन लगायत गाईको आहार व्यवस्थापनका लागि महायज्ञ आयोजना गर्न लागिएको आयोजक मूल समितिका संयोजक एवं श्री योगी आदित्यनाथ फाउण्डेशनका अध्यक्ष भरतनाथ योगीले जानकारी दिए ।

गौशालामा रहेका पाँच सय बढी असहाय, बेसहारा, गौमाताहरुको विगत दुई वर्ष देखि फाउण्डेशनले पालन पोषण गरिरहेको र हरेक दिन बेसहारा गाईहरुको संख्या बढ्दै गएकाले थप व्यवस्थापन गर्न कठिन भएका कारण सबैको सल्लाहमा महायज्ञ सञ्चालन गर्न लागिएको योगीले जानकारी दिए । गौशालामा रहेका गौमाताहरुको संरक्षण तथा बसाई व्यवस्थापन, आहार व्यवस्थापन लगायत राष्ट्रिय जनावर गाईको महत्व समाजमा स्थापित गर्नका लागि “श्रीमद्भागवत एवं शतचण्डी श्रीङ्खारिक पञ्चआरती धार्मिक दशै महोत्सव” आयोजना गरिएको र महायज्ञको तयारी तीव्र रुपमा अगाडि बढाईएको मूल आयोजक समितिका संयोजक भरतनाथ योगीले जानकारी दिए ।

महायज्ञका सल्लाहकार समितिका संयोजक डा.भोलानाथ योगीले हिन्दु धर्म अनुसार हरेक घरमा गाई हुनुपर्छ भनिएको तर आधुनिकतासँगै गाई संरक्षणमा ध्यान जान नसक्दा राष्ट्रिय एवं धार्मिक जनावरको संरक्षण एवं व्यवस्थापन गर्न आवश्यक भएको महशुस गरेर यस महायज्ञको आयोजना गरिएको बताए । उनले अन्य महायज्ञभन्दा यो महायज्ञ फरक उद्देश्यले आयोजना गरिएको भन्दै सहयोग गर्न सम्पूर्णमा अनुरोध गरे । महायज्ञको मुख्य वाचकमा अन्तर्राष्ट्रि«य स्वर्ण पदकबाट विभुषित प.ं श्री अमृतशरण देवाचार्य रहेको जानकारी दिए ।

महायज्ञमा करोड दीप प्रज्वलन गरिने

गौमाता रक्षार्थ आयोजना गरिएको महायज्ञ एवं दशै धार्मिक महोत्सवमा करोड दीप प्रज्वलन गरिने भएको छ । ‘श्रीमद्भागवत एवं शतचण्डी श्रीङ्खारिक पञ्चआरती धार्मीक दशै महोत्सव’ मा करोड दीप प्रज्वलन हुने आयोजक मूल समितिका संयोजक एवं श्री योगी आदित्यनाथ फाउण्डेशनका अध्यक्ष भरतनाथ योगीले जानकारी दिए । अन्य महायज्ञभन्दा फरक उद्देश्यले आयोजना गरिएकाले यस यज्ञलाई सफल बनाउनका लागि सबैजना आ–आफ्नो स्थानबाट लागि पर्न आयोजक मूल समितिले अनुरोध गरेको छ ।