खोज

बुटवल,२६ असोज । नेपाली कांग्रेसका नेता शेखर कोइरालाले कोशी प्रदेशको मुख्यमन्त्रीको दाबीबाट केदार कार्कीलाई ब्याक गराउन नसक्ने सन्देश पार्टी सभापति शेरबहादुर देउवालाई पठाएका छन् । शुक्रबार विहान सभापति देउवाका विश्वासपत्र नेता ज्ञानेन्द्रबहादुर कार्की र नेता कोइरालाबीच कोशी प्रदेशबारे टेलिफोन संवाद भएको थियो ।
ज्ञानेन्द्रले शेखरलाई केदारले पेस गरेको मुख्यमन्त्री दाबी फिर्ता गराउन आग्रह गरेका थिए । जवाफमा शेखरले त्यो सम्भावनै नरहेको जवाफ दिएका थिए ।
कोशी प्रदेशमा कांग्रेस नेतृत्वको सरकार बनाउन आफूले राखेको प्रस्तावको बेवस्ता गरेकोमा ज्ञानेन्द्रसँग शेखरको आपत्ति थियो ।
माओवादीलाई तीन वटा प्रदेशमा मुख्यमन्त्री छाड्ने पार्टीको निर्णयमा पनि शेखरले प्रश्न उठाएका थिए ।
गठबन्धन सरकारमा मधेस प्रदेशको नेतृत्व जसपाले गरेको छ भने गण्डकी, लुम्बिनी र सुदूरपश्चिम प्रदेशमा कांग्रेसको नेतृत्वमा सरकार छ । बागमती र कर्णालीमा सरकारको नेतृत्व गरेको माओवादीलाई बिहीबार बसेको गठबन्धनको बैठकले कोशीमा पनि मुख्यमन्त्री दिन निर्णय गरेको थियो ।

यसअघि गठबन्धनमा कोशी प्रदेश कांग्रेसको भागमा परेको थियो । सोही अनुसार कांग्रेस कोशी प्रदेश संसदीय दलका नेता उद्धव थापा दुई पटक मुख्यमन्त्री बने । तर, उनको पहिलो पटकको नियुक्त र दोस्रो पटक विश्वास लिँदाको प्रक्रिया संवैधानिक नभएको सर्वोच्च अदालतले ठहर गरेको थियो ।

उद्धवको विकल्पमा केदार, हिमाल कार्की, अमृत अर्याल र भीम पराजुलीले मुख्यमन्त्रीमा दाबी गरेपछि देउवाले पार्टीभित्रको विवाद पन्छाउन माओवादीलाई मुख्यमन्त्री दिने निधो गरेका थिए । त्यसको विरुद्धमा केदार कार्कीले एमालेसँग मिलेर मुख्यमन्त्रीमा दाबी पेस गरेपछि गठबन्धन समस्यामा परेको छ ।

बिहीबार प्रदेश प्रमुख परशुराम खापुङ समक्ष शेखर पक्षीय केदार कार्की र माओवादीका इन्द्र आङ्बोले मुख्यमन्त्रीमा दाबी पेश गरेका छन्। केदारले एमालेको समर्थनमा ४७ सांसदको हस्ताक्षर बुझाएका छन् ।

यता आङ्बोले कांग्रेस, माओवादी, एकीकृत समाजवादी र जसपाका सासंदको हस्ताक्षर बुझाएका थिए । केदारलाई मुख्यमन्त्री बनाउन हस्ताक्षर गरेका कांग्रेसका ८ सांसदको पनि समर्थन देखाएर इन्द्रले दाबी पेस गरेकाले उनको दावी कमजोर देखिन्छ ।

गठबन्धनले मुख्यमन्त्रीमा अगाडि सारेका माओवादीका आङ्बोविरुद्ध एमालेको साथ लिएर शेखर पक्षीय केदार उभिएपछि कांग्रेसमा हलचल मच्चिएको छ । शुक्रबार विहान राष्ट्रपति रामचन्द्र पौडेलले पनि शेखरलाई फोन गरेर केदारलाई ब्याक गराउन आग्रह गरेका थिए । पार्टीभित्र सबै मिलेर आफूलाई पेल्न खोजेको भन्दै केदारलाई ब्याक नगराउने राष्ट्रपति पौडेललाई शेखरले जवाफ थियो ।

पार्टी बचाउन केदार कार्कीलाई मुख्यमन्त्रीमा दाबी पेस गर्न लगाएको भन्दै ब्याक नहुने शेखरको अडान छ ।
प्रधानमन्त्री प्रचण्डले पनि शेखरलाई फोन गरेर केदारको दाबी फिर्ता गराउन आग्रह गरेका थिए ।