खोज

सुनवल, २३ असोज ।

पश्चिम नवलपरासीको रामग्रामबाट सशस्त्र प्रहरीले ठूलो परिमाणमा पटका बरामद गरेको छ । सशस्त्र प्रहरीको परासीस्थित कमाण्ड पोष्टको टोलीले रामग्राम १२ कुनुवारबाट प्रदेश ३ ००१ च ११३८ नम्बरको पिकअप र चालक सहित उक्त परिमाणको पट्का नियन्त्रणमा लिएको हो ।

भारतबाट महेसपुर भन्सार नाका हुदै भित्र्याईको पटका बिक्रीका लागि लाने क्रममा प्रहरीले नियन्त्रणमा लिएको सशस्त्र प्रहरी बल २६ नम्बर गणका प्रहरी नायव उपरीक्षक यज्ञमान साउदले जानकारी दिए । कमान्ड पोष्टका सशस्त्र प्रहरी निरीक्षक केशव भट्टराईको कमान्डमा रहेको टोलीले तीव्र गतिमा रहेको पिकअपलाई शंका लागि चेकजाँच गर्ने क्रममा पट्का फेला परेको डिएसपी साउदले बताए ।

बरामद पटका प्रहरीले नष्ट गरेको छ भने पिकअप जिपलाई महेसपुर भन्सार कार्यालयमा बुझाईएको छ । सवारी चालक पाल्हीनन्दन ३ का सुनिल गुप्तालाई प्रहरीले नियन्त्रणमा लिए पनि उनी पछि भाग्न सफल भएका छन् । गुप्ताकै सुराकीको आधारमा महेशपुर बजार क्षेत्रको सम्भावित स्थानमा थप पट्का रहेको आशंकामा छापा मार्न गएको प्रहरी टोली र स्थानीयबिच तनावको अवस्था सृजना भएपछि गुप्ता भाग्न सफल भएको प्रहरीले जनाएको छ । महेशपुरमा अवैध रुपमा पट्का भित्र्याएको सूचनाको आधारमा प्रहरीले छापा मार्ने कोशिस गरेपनि स्थानीय प्रहरीमाथि नै जाईलागेपछि प्रहरी पछाडी हटेको थियो । पछि सशस्त्र र जनपथ प्रहरीको संयुक्त टोलीले थप खानतलासी गरेपनि कुनै समान फेला नपरेको बताईएको छ ।

चाडपर्व नजिकिएसंगै भारतबाट पटका लुकाईछिपाई भित्र्याउने र विभिन्न शहरमा बिक्रीका लागि लाने गरिएकाले प्रहरीले चेकजाँच बढाएको छ । सशस्त्र प्रहरीले चाडपर्वलाई लक्षित गरेर सिमावर्ती क्षेत्रमा निगरानी बढाएको सशस्त्र प्रहरी उपरीक्षक धिरेन्द्रराज न्यौपानेले जानकारी दिए ।