खोज

दाङ,२३ असोज । नजिकिदै गरेका दशैं, तिहार, छठलगायतका चाडमा उपभोक्ता ठगिएको गुनासो आएपछि जिल्ला प्रशासन कार्यालय दाङले बजार अनुगमन शुरु गरेको छ ।
खाद्य प्रविधि तथा गुण नियन्त्रण डिभिजन कार्यालय, घरेलु तथा साना उद्योग कार्यालय, उद्योग वाणिज्य संघ, स्थानीय निकायको उपभोक्ता हित संरक्षण शाखाका प्रतिनिधि, प्रहरी, पत्रकारलगायतको उपस्थितिमा सोमबारदेखि घोराही बजार अनुगमन गरिएको छ ।

अनुगमनका क्रममा लेबल नभएका, उपभोग्य म्याद नाघेका खाद्यवस्तु फेला परेको अनुगमन टोलीकी संयोजक एवं सहायक प्रमुख जिल्ला अधिकारी सावित्रा पुनले जानकारी दिइन् । घोराही–१४ मा रहेको प्रतिभा ट्रेडर्स प्रालिबाट म्याद नाघेको आठ सय रुपैयाँ खुद्रा मूल्य रहेको ४२ प्याकेट हुलास चामल र एक हजार दुई सय रुपैयाँ खुद्रा मुल्य रहेको पाँच प्याकेट हुलास बासमती चामल जफत गरिएको छ । त्यस्तै गणपति इन्टर प्राइजेजमा रातो सिमी र भटमास लेबल नभएको फेला परेको प्रशासन कार्यालयले जानकारी दिएको छ । बञ्जाडे किराना पसलमा पनि म्याद गएको पेय पदार्थ र चिजबल फेला परेको छ । म्याद नाघेको खाद्यवस्तु प्रशासनले नियन्त्रणमा लिएको छ । जफत गरिएको अखाद्य वस्तु नष्ट गरिने प्रशासनले जनाएको छ ।
घोराहीमा रहेको बुटवल बेकरीमा पाउरोटीभित्र क्रिम राख्ने फलामको रड उपभोक्ताले खरिद गरेपछि फेला परेको उजुरीको आधारमा अनुगमन गरिएको थियो । अनुगमनका क्रममा रस पाउरोटी र केक खुलारुपमा राखेको फेला पारेपछि एक हजार एक सय ५० रुपैयाँ बराबरको पाउरोटी र केक जफत गरिएको छ ।
अनुगमन टोलीकी संयोजक एवं सहायक प्रमुख जिल्ला अधिकारी सावित्रा पुनले नियमित अनुगमन भइरहने बताउँदै घोराही नगरपालिकाको समन्वयमा डम्पिङ साइटमा लगेर जफत गरेको सबै सामग्री नष्ट गरिने जानकारी दिइन् । चाडवाडका समयमा कालोबजारी गर्ने, बढी मूल्यमा बेच्ने, स्टक लुकाउने, म्याद नाघेको सामग्री बेच्ने, बिलबिना कारोबार गर्ने जस्ता क्रियाकलाप नगर्न पनि व्यवसायीलाई अनुरोध गरेकी छन् । उपभोक्ताले पनि म्याद राम्रोसँग हेरेर सामग्री खरिद गर्नुपर्ने र सामानको बिल लिनुपर्ने बताएकी छन् । सम्पूर्ण व्यवसायीले अनिवर्या विल दिन पनि अनुरोध गरेकी छन् । विल नदिने व्यावसायीलाई कारवाही हुने बताउँदै उनले बिल नपाएमा उजुरी गर्न समेत अनुरोध गरिन् । खाद्य प्रविधि तथा गुण नियन्त्रण डिभिजन कार्यालय तुलसीपुरका खाद्य निरीक्षक राजेश चौधरीले मापदण्डभित्रै रहेर गोदाममा खाद्य बस्तु राख्नुपर्ने बताउँदै गोदाममा मुसा मार्न विषादीको प्रयोग गर्न नहुने बताए । लेवल लगाएर मात्र सामान बजारमा पठाउन उद्योग सञ्चालकलाई अनुरोध गरेका छन् ।