खोज

इजरायल र गाजाबीच शनिवारदेखि जारी युद्धमा १० नेपालीको मृत्यु भएको खबरले नेपाल शोकमा डुबेको छ । अझैपनि युद्ध जारी रहेकोले हताहती हुन सक्ने संभावना छ । त्यहाँ रहेका नेपालीहरूले आफूहरूलाई छिटो उद्धार गर्न नेपाल सरकारको ध्यानाकर्षण गराएका छन ।

हवाई हमलासँगै आतङ्कवादी हमला निरन्तर जारी छ । जसले गर्दा नेपालीहरू निकै त्रासमा छन् । उनीहरूले निरन्तर रूपमा उद्धारका लागि अनुरोध गर्दै आएका छन् । तर, अहिलेसम्म उद्धार हुन सकेको छैन । यो घटनामा नेपाल सरकारको कमजोर कुटनीति देखिएको छ । आक्रमणमा परी ज्यान गुमाएकाको परिवारलाई १०/१० लाख राहत दिने निर्णय सरकारले गरेको छ । यसका लागि सरकारलाई धन्यवाद दिनैपर्दछ तर सरकारले नेपाली बिद्यार्थीको छिटो उद्धारमा ध्यान दिनुपर्नेमा सार्वजनिक बिदा दिन हतार गरेको छ । सरकारको अपरिपक्वताको यो पछिल्लो नमूना तथा दृष्टान्त हो । सोमबार अपराह्न बसेको मन्त्रिपरिषद् बैठकले इजरायलमा मृत्यु भएका नेपालीको शोकमा मङ्गलबार सार्वजनिक बिदा दिने निर्णय गरेको हो । इजरायलमा रहेका अरू देशले आफ्ना नागरिक उद्धार गरिसकेका छन तर नेपाल सरकार बल्ल सोमबार मन्त्रीपरिषद बैठक बसेर उद्धारका लागि पहल गरेको छ ।

बिडम्वना इजरायलमा कति बेला कहाँ के हुने हो भन्ने त्रास कायम रहँदा सरकार भने नेपालीको तथ्याँक संकलनमा लागेको छ । यो भन्दा दुःखको कुरा के हुन्छ ? नेपाली विद्यार्थीहरूले अन्य देशका नागरिकहरूको धमाधम उद्धार भएको तर नेपाली विद्यार्थी बंकरमा बसेर जीवन मरणको त्रासदीमा बाँच्नु परिरहेको गुनासो गरेका छन । उनीहरू छिटोछिटो उद्धारको पर्खाइमा छन् । युद्धग्रस्त क्षेत्र नजिकै रहेका नेपाली विद्यार्थीको शनिवारदेखि आजसम्म उद्धार हुन नसक्नुका पछि कसको कमजोरी हो ? सरकारले जवाफ दिनुपर्दछ । आफूहरूसँगै रहेका थाइल्यान्ड, इजरायल, भारत, पाकिस्तान लगायतका अन्य देशका विद्यार्थीको उद्धार गरिसकिएको विद्यार्थीहरूको भनाई छ । नेपाली दूतावास समेत उद्धारमा निरिह देखिनु चिन्ताको विषय हो । यसबाट के देखिन्छ भने नेपालको कुटनीति त्यहाँ अत्यन्त कमजोर छ । विद्यार्थीले पटकपटक उद्धारको लागि आग्रह गर्दा दुताबास निरिह जस्तै भएको छ । इजरायमा विद्यार्थीहरू बस्ने ठाउँलाई सुरक्षित मानिएको थियो तर त्यही आक्रमण भयो । विद्यार्थीका अनुसार बाहिर गोली चलेको बम पड्किएको आवाज आइरहेको छ । जसले गर्दा कति बेला के हुन्छ भन्नेमा डरै डरमा बस्नु परिरहेको उनीहरूको भनाई छ । कस्तो बिडम्वना आफ्नै साथी गोली लागेर ढलेको छ ।

फेरि बम पड्किने, गोली चल्ने क्रम जारी छ । यस्तो अवस्थामा नेपाल सरकारले सोमबारमात्रै उद्धारका लागि सकृयता देखाउनु चिन्ताको कुरा हो । सरकारले उद्धारमा तदारुकता देखाउनुपर्नेमा सार्वजनिक विदा दिन हतार गरेको छ । हो यो राष्ट्रिय शोकको बेला हो तर त्यो भन्दा पहिले उद्धार सर्वाधिक प्राथमिकता हुनुपथ्र्यो । अव सरकारले नेपाली विदार्थीको शव छिटोभन्दा छिटो नेपाल ल्याएर पीडित परिवारलाई हस्तान्तरण गरोस् । अझैपनि समय छ– सरकारले त्यहाँ रहेका सवै नेपालीको सकुशल उद्धारको पहल गर्न ढिलाई नगरोस् ।