खोज

बुटवल, १४ असोज ।

कपिलवस्तु र अर्घाखाँचीको सिमाना पत्थरकोटबाट शनिबार राति प्रहरीले ठूलो मात्रामा प्रतिबन्धित रक्तचन्दन काठ सहित ८ जनालाई नियन्त्रणमा लिएको छ । रातिमा हुने चोरी तस्करी नियन्त्रण गर्न भन्दै शनिवार राति जिल्ला प्रहरी कार्यालय कपिलवस्तुको टोली पत्थरकोट पुगेको थियो ।

प्रहरीले चेकजाँच गर्ने क्रममा रक्तचन्दन लोड गरेको गाडी फेला पारेको हो । प्रहरीले उक्त रक्तचन्दन के प्रयोजनका लागि कहाँबाट ल्याएको हो, कहाँ लैजान लागेको भन्ने बारेमा केही खुलाएको छैन । प्रहरीले रक्तचन्दन ओसारपसारमा संलग्न ८ जना मानिस सहित ना ५ ख ७३८२ नम्बरको १० चक्के ट्रक र लु २ च १६३९ नम्बरको बलेरो डबल क्याप जिप सहित समेत नियन्त्रणमा लिएको जनाएको छ ।

प्रहरीले पक्राउ परेका मानिसहरुको नाम भने खुलाएको छैन । जिल्ला प्रहरी कार्यालय कपिलवस्तुका प्रमुख प्रहरी उपरीक्षक नवरत्न पौडलले गस्तीमा रहेको प्रहरी टोलीले गाडीसहित मानिसलाई नियन्त्रणमा लिएको जानकारी दिए । नियन्त्रणमा लिएको रक्तचन्दन ६ सय ५३ केजी रहेको र त्यसको मूल्य अन्दाजी करिब एक करोड बढी रहेको प्रहरीको भनाई छ ।

यता लुम्बिनी प्रदेश प्रहरी कार्यालय दाङका प्रमुख प्रहरी नायव महानिरीक्षक उमेश राज जोशीले कपिलवस्तु र अर्घाखाँचीको सिमानामा पर्ने पत्थरकोटबाट शनिबार राति चेकजाँचको क्रममा रक्तचन्दन लोड गरेका गाडी प्रहरीले नियन्त्रणमा लिएर अनुसन्धान गरिरहेको बताए । यस विषयमा कपिलवस्तु प्रहरीले काम गरिरहेको प्रमुख जोशीको भनाई छ । चाडवाडलाई लक्षित गरेर चेकजाँचलाई कडाई गरेको र सोही अनुसार प्रहरीले विभिन्न ठाउँमा रातिमा गस्ती पेट्रोलिङ तथा चेकजाँचलाई कडाई गर्दै लगेको प्रहरीको भनाई छ ।