खोज

बुटवल,१२ असोज । रुपन्देहीको तिलोत्तमा १३ तीनधुरास्थित जनता माध्यमिक विद्यालयले निशुल्क पढ्न र दैनिक आम्दानी पनि हुने २४ महिने औद्योगिक प्रशिक्षण तालिम शुरु गर्ने भएको छ । लुम्बिनी प्रदेश सरकार सामाजिक बिकाश मन्त्रालयको स्विकृत बजेट अनुसार पूर्णतया निशुल्क यो तालिम पढ्दै आय–आर्जन गर्न सकिने कार्यक्रम हो । यो तालिममा सहभागी हुन एसइईमा जुनसुकै ग्रेडमा उत्तीर्ण भएको भएपनि हुन्छ । यसलाई स्विस सरकारको इन्स्योर परियोजनाले सहयोग गरेको छ । यो तालिम शुरुको ३ महिना विद्यालयमा र त्यसपछि हप्ताको एक दिन विद्यालयमा बांकी भवन निर्माण स्थलमा काम गर्दै सिक्न पाइने विद्यालयका प्रधानाध्यापक प्रचण्ड जीसीले बताए । यो तालिम लिएपछि प्रि–डिप्लोमा अर्थात सब–ओभरसियर सरहको प्रमाण पत्र पाइने प्रधानाध्यापक जीसीले बताए । यो तालिममा सहभागी विद्यार्थीले प्रत्येक दिन दैनिक हाजिरी बापत यातायात खर्च स्वरूप प्रति दिन रु १०० र उद्योगबाट मासिकरुपमा प्रति विद्यार्थी कम्तीमा ५ हजार २ सय रुपैयां दिने गर्छ ।
२० जनाका लागि मात्र कोटा रहेको यो तालिममा १६ वर्षदेखि ४० वर्ष उमेरका सहभागी हुन पाउने तर २५ बर्ष उमेर समुहलाई प्राथमिकता दिइने प्रअ जीसीले बताए । यो विषय लुम्बिनी प्रदेशका १२ वटा जिल्लाका १५ विद्यालयले मात्र पठनपाठनको अनुमति पाएका छन् ।
बि.स. २०३८ सालमा स्थापना भएर २०५७ सालमा नि.मा.बि. तथा २०६४ सालमा मा. बि. कक्षा संचालन भएको बिद्यालयले बि.स.२०६७ सालमा महायज्ञ संचालन गरि प्राबिधिक शिक्षाको कल्पना गरेको थियो । बि.सं. २०७५ सालमा सिभिल इन्जिनियरिंग तर्फ १८ महिने प्रि डिप्लोमा कक्षा को अनुमति प्राप्त गरि २६ जना बिद्यार्थी बाट र बि.स.२०७६ सालमा ३ बर्से डिप्लोमा सिभिल इन्जिनियरिंगको सम्बन्धन प्राप्त गरि १८ जना विद्यार्थी बाट कक्षा संचालन भएको थियो । बिद्यालयामा हाल १२५ जना बिद्यार्थी प्राबिधिक तर्फ अध्यनरत छन् भने करिब ५० जना भन्दा बढीले प्रि डिप्लोमा पास गरिसकेका छन् भने पहिलो ब्याच मा १७ जना ले डिप्लोमा सिभिल इन्जीनियरिंग उर्तिण गरेका छन् । उत्पादनको ५० प्रतिशत बिद्यार्थी रोजगार प्राप्त गर्न र स्वरोजगारी बन्न सफल पनि रहेका छन् ।
हाल सम्म बिद्यालयबाट सिभिल इन्जिनियरिंग तर्फ प्रि–डिप्लोमा (सब– ओभरसियर) सम्पन्न बिद्यार्थीहरु २०७५ सालमा २६ जना, २०७६ सालमा २५ जना , २०७७ सालमा २६ जना र २०७८ सालमा १९ जना गरि जम्मा ९६ जना रहेका छन् भने डिप्लोमा तर्फ १७ जना ले सम्पन्न गरेका छन । २०८० मा हाल अध्यनरत सिभिल इन्जिनियरिंग तर्फ डिप्लोमामा १०६ जना र प्रि–डिप्लोमामा १९ जना गरि १२५ जना बिद्यार्थी अध्यनरत रहेका छन् । स्थानीय विद्यार्थीलाई सहभागी गराउन विद्यालयले १७ वटै वडामा जनप्रतिनिधिको उपस्थितिमा तालिमबारे जानकारीमूलक कार्यक्रम गरेको विद्यालयले जनाएको छ ।