© २०२३
२८ भाद्र २०८१, शुक्रबार
२८ भाद्र २०८१, शुक्रबार
नेपालगञ्ज, ११ असोज ।
चिकित्सक तथा स्वास्थ्यकर्मीको सुरक्षाको माग गर्दै बाँकेका चिकित्सक तथा स्वास्थ्यकर्मीहरू सडकमा निस्केका छन् । नेपाल चिकित्सक सङ्घ बाँकेको नेतृत्वमा जिल्लाका सरकारी तथा निजी अस्पतालका चिकित्सकहरू आकस्मिक सेवा बाहेक सबै सेवा बन्द गरेर सुरक्षाको माग गर्दै सडकमा उत्रेका हुन् ।
नेपाल चिकित्सक सङ्घ बाँकेका अध्यक्ष डा. विनोदकुमार थापाले चिकित्सक तथा स्वास्थ्यकर्मीमाथि शृङ्खलाबद्ध रूपमा आक्रमण हुन थालेपछि बाध्य भएर सुरक्षाको ग्यारेन्टी माग गर्दै आन्दोलनमा उत्रिनुपरेको बताए ।
चिकित्सकमाथि सुनियोजित रूपमा गरिएका साङ्घातिक आक्रमणले ढुक्क भएर बिरामीको सेवा गर्ने अवस्था नरहेपछि आन्दोलनमा उत्रनुको विकल्प नरहेकाले यो अवस्था आएको उनले बताए ।
अध्यक्ष डा. थापाले सरकारले दोषीमाथि कारबाही गर्नुपर्ने र यस्ता घटना दोहोरिन नदिने प्रतिबद्धता नआएसम्म आन्दोलन जारी रहने बताए । आकस्मिक सेवाबाहेक अन्य सबै सेवा बन्द गरेर डाक्टरहरू आन्दोलनमा उत्रिएपछि विभिन्न जिल्लाबाट उपचारका लागि नेपालगञ्ज आउने बिरामी मर्कामा परेका छन् ।
नेपाल चिकित्सक संघ बाँकेले पोखरा, हेटौडा, गुल्मी, मोरङलगायतका जिल्लामा शृङ्खलाबद्ध रूपमा डाक्टर तथा स्वास्थ्यकर्मीमाथि आक्रमण भएको जनाएको छ । सङ्घका अनुसार पछिल्लो पटक मणिपाल अस्पताल पोखरामा सहकर्मी कुटिएपछि स्वास्थ्यकर्मीहरू सुरक्षा खोज्दै आन्दोलनमा उत्रेको जनाएको छ ।
यसअघि बुधवार आयोजना गरिएको जिल्लाका निजी तथा सरकारी अस्पतालमा कार्यरत चिकित्सकको भेलाले बिहीबार बिहानसम्म सरकारको तर्फबाट दोषीलाई कारबाही नगरिएमा आन्दोलनमा उत्रिने निर्णय गरिएको थियो ।
सोही निर्णय बमोजिम बिहीबारबाट आफूहरू आन्दोलनमा उत्रिएको वेस्टर्न अस्पताल नेपालगन्जका प्रबन्ध निर्देशक डा. राहुल थापाले बताए । चिकित्सकको सुरक्षा अति नै गम्भीर मोडमा पुगेको जनाउँदै आफ्नो सुरक्षा नभएसम्म अरूको ज्यान कसरी जोगाउन सकिन्छ ? प्रश्न गर्दै डाक्टर थापाले यस विषयमा सरकारले तत्काल गम्भीर भएर निर्णय गर्नुपर्ने माग गरे ।
© २०२३
सर्वाधिकार सुरक्षित
Design & Developed By:
