खोज

बुटवल, ९ असोज ।

बुटवलमा विभिन्न धार्मिक संघसंस्थाहरुको अगुवाईमा अन्तर धार्मिक शान्ति सन्जाल गठन भएको छ । देशभित्र रहेका सबै धर्म, जातीहरुमा सहिष्णुता र शान्ति कायम गर्ने उद्देश्यका साथ अन्तर धार्मिक शान्ति सञ्जाल गठन गरिएको हो ।

जिल्ला क्रिश्चियन समाजको अगुवाईमा भएको भेलालाई संविधान सभा सदस्य तथा समाजसेवी नेत्र पन्थीले सम्बोधन गर्दै मिलेर बसेको नेपाली समाजमा एकता र सदभाव कायम गर्न जरुरी रहेको बताए । सबै धर्म र जातिहरुको साझा फुलबारीका रुपमा पहिचान बनाएको नेपालमा जनताको चाहना र माग अनुसार नै धर्मनिरपेक्षता घोषणा भएको भन्दै उनले सबै धर्मलाई सम्मान गर्नुपर्ने बताए ।

संविधान सभा सदस्य हाजी नजिर मियाले एक महिना अघिदेखि आफुहरु बैठकहरु बसेर यो अभियानलाई सार्थकता दिने काम सम्पन्न गरेको बताए । धार्मिक सहिष्णुता कायम गर्दा सबैको सम्मान हुने र एकता कायम हुने भन्दै उनले केही अतिवादीहरुको प्रवेशबाट गलत प्रचार हुनु दुखद भएको बताए ।

शान्ति कायम हुने गरी अन्तर धार्मिक समिति बनाएर राष्ट्रिय स्तरमा पुयाउने गरी लैजाने उनले बताए । एक अर्काको सम्मान र अस्तित्व स्वीकार गर्ने गरी कार्यक्रमहरु अघि बढाउने उनले बताए । धर्मको नाममा गरिएको गलत प्रचार रोक्न जरुरी रहेको उनले बताए ।

शान्ति र सद्भाव कायम गर्ने र संविधानको अक्षरता पालना गराउने गरी अभियान चलाउन संजाल एकमत भएर बढ्ने उनले बताए ।

कार्यक्रममा जिल्ला क्रिश्चियन समाज रुपन्देहीका अध्यक्ष सुरज थापा, अन्तर्राष्ट्रिय बुद्घ परियती उदय विहारका महासचिव याम बहादुर थापा, समाजका कोषाध्यक्ष मेघराज घिमिरेले बुटवलबाट नया अभियानको शुरुवात भएको भन्दै यसले देशब्यापी हुने बताए ।

यसैबीच भेलाले हाजी नजिर मियाको संयोजकत्वमा सचिव गणेश घिमिरे, सदस्यहरु सुरज थापा, बाबुराम बस्नेत, नसिबदार मिया, सफर मिया, याम बहादुर थापा, मीन बहादुर सारुको नाम सिफारिस गरेको छ । असोज १५ गतेभित्र सबै धर्मावलम्बीहरुको नामावली संकलन गरी सार्वजनिक गर्ने तयारी रहेको उनले बताए ।