खोज

नेपालगञ्ज, ७ असोज ।

कर्णाली प्रदेश प्रहरी तालिम केन्द्र सुर्खेतद्वारा सञ्चालन गरिएको १३९ औं समूहका ३ सय जना प्रहरी जवान आधारभूत तालिम पश्चात कार्य क्षेत्रमा प्रवेश गरेका छन् । कर्णाली प्रदेश प्रहरी तालिम केन्द्र सुर्खेतले आइतबार नेपालगन्जमा दीक्षान्त समारोहको आयोजना गरेर आधारभूत तालिम प्राप्त गरेका ३ सय जना जवानलाई दीक्षित गरेर कार्यक्षेत्रमा पठाएको हो ।

कर्णाली प्रदेशका प्रहरी प्रमुख डिआईजी भीमप्रसाद ढकालले आधारभूत तालिम प्राप्त गरेका जवानहरुलाई दज्र्यानी चिन्ह प्रदान गरेर कार्यक्षेत्रमा प्रवेश गराएका हुन् । सोही अवसरमा उनले तालिममा उत्कृष्ट स्थान प्राप्त गर्ने प्रशिक्षार्थी र राम्रो तालिम दिने प्रशिक्षकलाई प्रमाणपत्र र पुरस्कार वितरण गरे ।

तालिम पाएका प्रहरी जवानहरुलाई सम्बोधन गर्दै कर्णाली प्रदेशका प्रहरी प्रमुख डिआइजी ढकालले समयको परिवर्तनसँगै नयाँ प्रकृतिका आपराधिक क्रियाक्लाप बढ्दै गएककाले प्रहरीलाई चुनौती बढेको जनाउँदै प्रहरीले पनि नयाँ तरिकाले अनुसन्धान र नियन्त्रण कार्य गर्नुपर्ने बताए । तालिम प्राप्त गरेर कार्यक्षेत्रमा प्रवेश गर्ने सबै प्रहरीलाई आम नागरिकको सेवालाई मुख्य केन्द्र बनाएर काम गर्न निर्देशन दिए ।

डिआइजी ढकालले देशको अति दुर्गमदेखि अति सुगम सबै स्थानमा राज्यको उपस्थिति देखाउने माध्यम प्रहरी मात्रै भएको जनाउँदै प्रहरीले सरकारको प्रतिनिधि भएर काम गर्नुपर्ने बताए । साथै सम्बोधनका क्रममा डिआइजी ढकालले कर्णाली प्रदेश प्रहरी तालिम केन्द्र नेपालगञ्जबाट कर्णाली प्रदेशमा स्थानान्तरणको प्रक्रिया सुरु भईसकेको जानकारी दिए ।

कर्णाली प्रदेश प्रहरी तालिम केन्द्र सुर्खेत हाल नेपालगन्जका समादेशक वरिष्ठ प्रहरी उपरिक्षक सुशीलसिंह राठौरले २०७९ कात्तिक २० गतेबाट सुरु भई दुई सय ३४ दिनसम्म सञ्चालन गरिएको प्रहरी जवानको सो आधारभूत तालिममा १७८ पुरुष र १२२ महिला गरेर ३०० जना प्रशिक्षार्थीले तालिम पूरा गरेको जानकारी दिए ।

तालिम संयोजक डिएसपी ज्ञानेन्द्रबहादुर बस्नेतले तालिम प्रतिवेदन प्रस्तुत गरेका थिए । कार्यक्रममा नेपाली सेनाका महासेनानी मनोज थापा, सशस्त्र प्रहरी नम्बर ५ विन्दवासिनी वाहिनी मुख्यालयका प्रमुख डिआईजी अभि खत्री, बाँकेका प्रमुख जिल्ला अधिकारी विपिन आचार्य, सुर्खेतका प्रमुख जिल्ला अधिकारी नारायणप्रसाद सापकोटा लगायत बाँके, बर्दिया र सुर्खेतका प्रहरी प्रमुख र नव प्रवेशी प्रहरी जवानका अभिभावकहरुको उपस्थिति थियो ।