खोज

बुटवल,५ असोज । सरकारले माओवादी नेता कृष्णबहादुर महरा र उनका छोरामाथि सुन तस्करीको विषयमा अनुसन्धान गर्ने एमालेको प्रस्ताव अस्वीकार गरेको छ ।

सुन तस्करीका विषयमा आयोग गठनका विषयमा गृहमन्त्रीले शुक्रबार डाकेको छलफलमा एमाले सचेतक महेश बर्तौलाले सो प्रस्ताव राखेका थिए ।

भेप प्रकरणमा माओवादी नेता महरा र उनका छोरा जोडिएका छन् । तर, आजको बैठकमा यो विषयमा अनुसन्धान गर्न गृहमन्त्रीले अस्वीकार गरेका हुन् ।

राष्ट्रिय मान्यताप्राप्त दलहरुको बैठकले गत भदौ ६ गते सुन तस्करीका विषयमा छानबिन गर्न उच्चस्तरीय छानबिन आयोग असोज ५ गते बनाउने निर्णय गरेको थियो । उक्त सहमतिमा आयोगलाई विदेशबाट ई सिग्रेट भेप्स र ब्रेक शुमा राखी अवैध पैठारी तस्करी गरिएको सुनलगायत पटकपटक तस्करी भइ सुन आइरहेकोमा यसलाई नियन्त्रण गर्न अध्ययन गरी प्रतिवेदन पेश गर्ने भनिएको छ ।

एमाले सचेतक बर्तौलाको प्रस्तावमा २०८० साउन २ र सोभन्दा अघि वा पछि विदेशबाट इलेक्ट्रिक सिगरेट भेप्स र ब्रेक शुमा राखी अन्य तरिका अपनाइ विभिन्न स्थानबाट गरिएको सुनको अवैध तस्करीको प्रकृति, परिणाम, दायरा र सो कार्यमा संलग्न व्यक्तिहरुका सम्बन्धमा स्वतन्त्र एवं निष्पक्ष छानबिन र अनुसन्धान गरी कानूनबमोजिम कारबाहीका लागि सिफारिस गर्ने उल्लेख छ ।

बैठकपछि एमाले सचेतक बर्तौलाले सरकार पूर्वसहमतिबाट पछि हट्न खोजेको आरोप लगाए ।