खोज

नवलपुुर, ५ असोज ।

बढ्दो दुुर्घटना न्युुनीकरण गर्न पुर्वी नवलपरासीका तीन स्थानमा सवारी साधन स्क्यान गर्ने उपकरण (मेसिन) जडान गरिएको छ ।

जिल्ला प्रवेश गर्ने, बाहिरिने गरी दुई नाका र कावासोती गरी तीन स्थानमा गाडी स्क्यान गर्ने अत्याधुनिक मेसिन जडान गरिएको जिल्ला प्रहरी कार्यालयले जनाएको छ । जिल्ला प्रहरी कार्यालयका अनुुसार नारायणगढ–बुटवल सडकखण्डमा हुने दुर्घटना न्यूनीकरण गर्न र जिल्लाको सुरक्षा संवेदनशीलतालाई मध्यनजर गर्ने उद्देश्यले जिल्लाका तीन ठाउँमा गाडी स्क्यान मेसिन जडान गरिएको हो ।

गण्डकी प्रदेशकै भारतसँग सीमा नाका जोडिएको एकमात्रै जिल्लाका रुपमा रहेको पुर्वी नवलपरासीको पश्चिमबाट जिल्ला भित्रिने नाका दाउन्ने, पूर्वबाट जिल्ला भित्रिने नाका गैँडाकोटको पुलचोक तथा जिल्ला प्रहरी कार्यालयमा सवारी साधन स्क्यान गर्ने अत्याधुनिक मेसिन, चेकपोष्ट र सिसी क्यामेरा जडान गर्ने काम भएको जिल्ला प्रहरी कार्यालयले जनाएको छ ।

देशकै सबैभन्दा लामो राजमार्ग पूर्वपश्चिम राजमार्ग अन्तर्गत मध्यभागमा पर्ने जिल्लाका तीनवटै स्थानमा राखिने सवारी साधन स्क्यान मेसिनले सवारी साधन सहित चालक एवं आवश्यकता अनुसार यात्रुको पनि स्वचालित रुपमा स्क्यानिङ गरी अभिलेख राख्ने प्रहरीको भनाई छ ।

जिल्लामा जडान भएको स्क्यान मेसिनले जिल्लाको समग्र सुरक्षा व्यवस्था तथा ट्राफिक व्यवस्थापनमा समेत सहयोग पुग्ने प्रहरीको भनाइ छ । राजमार्गमा सवारी साधन स्क्यान मेसिन राख्नका लागि जिल्ला प्रहरी कार्यालयले यसअघि नै नेपाल सरकारलाई आग्रह गरेको र सरकार र सडक आयोजनासँगको परामर्शमा आयोजनाले नै यी उपकरण राखिदिन सहमति जनाएको प्रहरीले जनाएको छ ।

राजमार्गमा जडान भएका स्क्यान मेसिनसहित चेकपोष्ट र सिसी क्यामेरा जडानको सबै खर्च एशियाली विकास बैंक (एडिबी) ले व्यहोर्ने सहमति भएको छ । नारायणगढ–बुटवल सडकखण्ड विस्तारको कामले पूर्णता पाएसँगै तीनवटै स्थानमा सवारीसाधन स्क्यान मेसिन तथा सिसी क्यामेरा जडानको काम भएको हो ।