खोज

बुटवल, ५ असोज ।

राष्ट्रिय परीक्षा बोर्डका कर्मचारीहरुले नेपाल सरकारले विद्यालय शिक्षा सम्बन्धी कानुनलाई संघीय संरचना अनुरुप व्यवस्थापन गर्नका संघीय सदनमा प्रस्तुत गरेको शिक्षा विधेयकको विरोध जनाएका छन् ।

गत भदौ २७ गते दर्ता भएको शिक्षा सम्बन्धी संशोधन र एकीकरण गर्न बनेको विधेयक, २०८० ले राष्ट्रिय परिक्षा बोर्ड यसअघि स्वायत्त निकायको रुपमा सञ्चालनमा आएको कानुनी व्यवस्थालाई परिमार्जन गरी बोर्डको स्वायत्तता मेटाउन खोजिएकोले यस नियमित कार्य सञ्चालनमा अप्ठयारो पार्ने कर्मचारीहरुले बताएका छन् ।

राष्ट्रिय परीक्षा बोर्डको सञ्चालनका लागि यस अगाडि बनेको ऐन र नेपाल सरकारसँग विगतमा भएका सहमति अनुसार बोर्डमा कार्यरत अस्थायी कर्मचारीहरुलाई प्रक्रिया पुर्याई स्थायी गरिने र अन्य सेवा सुविधाहरु नियम अनुसार गर्ने बताएको भएपनि प्रस्तावित ऐनमा कुनै कुरा उल्लेख नगरिएको भन्दै बोर्डमा कार्यरत कर्मचारीहरु शुक्रबारदेखि चरणबद्ध रुपमा संघर्षमा उत्रेको प्रेस विज्ञप्ती मार्फत जानकारी गराएका छन् । आन्दोलनको घोषित कार्ययोजना अनुसार राष्ट्रिय परीक्षा बोर्ड प्रदेश परीक्षा व्यवस्थापन कार्यालय, लुम्बिनी प्रदेश कार्यालयका सम्पूर्ण कर्मचारीहरुले शुक्रबार हातमा कालो पट्टी बाँधेर काम गरेका छन् ।