खोज

रुपन्देही, ४ असोज ।

पुर्वीय दर्शन र सनातन हिन्दु धर्म बिश्वकै उत्कृष्ट मानवीय प्रणाली भएको तथा प्राकृतिक र बैद्धिक दुवैको संगमका रुपमा रहेको एक कार्यक्रमका वक्ताहरुले बताएका छन् । भैरहवामा आयोजित पट्टाभिषेक महोत्सवमा सहभागी हिन्दु धर्मका महात्मा, सन्त, महन्थहरुले हिन्दु सनातन बैदिक धर्म संरक्षणका लागि सम्पूर्ण सनातनीहरु जाग्नु पर्ने बेला आएको बताएका हुन् ।

कार्यक्रममा नेपाल सन्त समाजका अध्यक्ष तथा हरिहर सन्यास आश्रमका प्रमुख ज्ञानानन्द सरस्वती महाराजले स्वामी शान्तानन्द महाराजलाई भैरहवा विद्याश्रमको पिठाधिश घोषणा गरेका थिए । स्वामी शान्तानन्दलाई पट्टाभिषेक र रुद्राभिषेकसहित श्री १००८ स्वामी महाराजको पदवीले बिभुषित गरी भैरहवा संस्कृत बिद्याश्रमको संरक्षक घोषणा गर्दै पदासिन गराइएको थियो ।

सो अवसरमा बोल्दै ज्ञानानन्द सरस्वती महाराजले राजनैतिक दलहरुका कारण सनातनी हिन्दु धर्म संकटमा परेकोले यसको रक्षार्थ एकजुट हुनुपर्ने आवश्यकता औंल्याए । बिगतमा नेपाललाई धर्म निरपेक्षता घोषणा गरेर दलहरुले धोका दिएको उल्लेख गर्दै हिन्दुत्व भनेको धर्म मात्र नभै सत्कर्म, संस्कार र सद्भाव पनि भएको बताए । कार्यक्रममा स्वामी विवेकानन्द महाराजले गुरुकुलहरुको सवलीकरण र सुधारमा ध्यान दिनुपर्ने आवश्यकता औंल्याउँदै गुरुकुलहरु दयनीय बन्दै गएकोमा चिन्ता ब्यक्त गरेका छन् ।

बुढानिलकण्ठ नारायणस्थानका स्वामी निगमानन्द गिरीले साधुत्व, बैदिक ज्ञान, आचरण र गुरुकुलमा गरेको योगदानका आधारमा सन्तलाई बिभुषित गर्ने परम्परा रहेको उल्लेख गर्दै हिन्दु सनातन बैदिक धर्म संरक्षणका लागि सम्पूर्ण सनातनीहरु जाग्नु पर्ने बेला आएको बताए । धार्मिक कार्यसँगै मानवीय प्रणालीमा उत्कृष्ट कार्य गरेवापत सन्तहरुले पाउने सम्मानित र उच्च पद श्री १००८ महाराज उपाधिबाट बिभुषित गर्ने प्रचलन रहेकोले भैरहवामा यो कार्यक्रम गरिएको उनले बताए ।

कार्यक्रममा भारतको बनारसस्थित काशी बिश्वनाथ मन्दिरका मुलभट्ट टेकनारायण उपाध्याय, स्वर्गद्वारी विद्याश्रम प्यूठानका महात्मा रुद्रानन्द ब्रम्हचारी, राजेश्वराय नन्द सरस्वती महाराज, डा. विश्वनाथ धिताल, सिनपा ३ का वडाध्यक्ष नारायणप्रसाद उपाध्याय, रोमणीप्रसाद पाठक, सभाध्यक्ष डिआर शर्मा, उपाध्यक्ष कृष्णप्रसाद भण्डारी, लगायतले बोल्दै हिन्दु धर्मले पुजापाठ गराउने मात्रै नभै अनुशासन, संस्कार र कर्तब्यसमेत सिकाउने भन्दै राज्यपक्षको उदासिनताका कारण आयातित धर्महरुले सनातनीहरुलाई संकटमा पारेको गुनासो गरेका थिए ।

परम्तपश्वी ब्रम्हालीन नारायणनन्द स्वामीजी महाराजद्वारा स्थापित तथा विभिन्न सन्त महात्माहरुको निर्देशन एवं सिद्धहस्तहरुको अथक परिश्रम र सहयोगबाट संचालन भएको संस्कृत विद्याश्रम भैरहवा बैदिक सनातन धर्म एवं बाङ्गमयको संरक्षण र उन्नयनका लागि निरन्तर प्रयत्नशील छ । यस संस्थाको संरक्षण एवं उत्तरोत्तर संबद्र्धनका लागि परम पुजनीय स्त्रोत्रिय ब्रहनिष्ट अनन्त श्री बिभुषण सत्यप्रकाशनन्द सरस्वती महाराजजीको बरद सानिध्य एवं नेपाल सन्त समाजका श्रद्धय स्वामीजीहरु लगाएत देश विदेशका अनेकौं सन्त महन्थ धर्ममुर्तीहरु बिद्यामुर्तीहरुको बिशिष्ट आतिथ्यतामा कार्यक्रम सम्पन्न भएको थियो ।