खोज

बर्दघाट, ३१ भदौ ।

अनाधिकृत रुख कटान गरेका जनप्रतिनिधि विरुद्ध पक्राउ पुर्जी जारी भए पनि पुर्जी जारी भएको लामो समय सम्म पक्राउ पर्न सकेका छैनन् । एकता सार्वजनिक जग्गा ब्यवस्थापन समितिले प्रतापपूर गाउँपालिका वडा नम्बर ९ स्थित गण्डक नहर क्षेत्रमा रहेका रुख अनाधिकृत रुपमा कटान गरेको मुद्दामा प्रतापपुर गाउँपालिका कार्यपालिका सदस्य खेम नारायण चौधरी, वडा नम्बर ९ का सदस्य विरेन्द्र कुमार चौधरी र सोही वडाका दशबहादुर चौधरी विरुद्ध मुद्दा दायर गरेको थियो ।

आरोपितहरुलाई पक्राउ गर्नको लागि भदौ १३ गते जिल्ला अदालत पश्चिम नवलपरासीले पक्राउ पुर्जी जारी गरेको थियो । पक्राउ पुर्जी जारी गरेको १७ दिनसम्म पनि उनीहरु पक्राउ परेका छैनन् । जनप्रतिनिधि नै रुख कटानमा सँलग्न रहेकोले पक्राउ नगर्न र कारवाही अघि नबढाउन आलटाल गरेको स्थानीयहरुले आरोप लगाएका छन् ।

कटान छपान स्वीकृतीविना रुख कटान भएपछि जिल्ला वन कार्यालयले कारवाही प्रकृया अघि बढाएर मुद्दा दायर गरेको थियो । जिल्ला वन कार्यालयका प्रमुख महेन्द्रराज वाग्लेले आरोपितहरुको खोजी भइरहेको र कानुनी कारवाहीको लागि मुद्दा प्रकृया समेत अघि बढेको बताए ।

जिल्ला वन कार्यालयले प्रतापपुर सुस्ता सव डिभिजन वन कार्यालय फेँचुवाका प्रमुख चिन बहादुर यादवलाई अनुसन्धान अधिकृत तोकी आरोपितहरुको खोजतलास गरेको वाग्लेले बताए । घटना भएको लामो समयसम्म आरोपितहरु किन पक्राउ परेनन् भन्ने जिज्ञासामा यादवले कानुनी प्रकृयाहरु पुरा गरी कारवाही अगाडि बढाउँदा पक्राउ गर्न ढिलो भएको बताउँदै जिल्ला वन कार्यालय, सेक्टर वन कार्यालय र प्रतापपुर सुस्ता सव डिभिजन कार्यालयको टोलीले खोजी गरिरहको र पक्राउ परेपनि नपरेपनि मुद्दा प्रकृया अघि बढाइने बताए ।

अदालतले पक्राउ पुर्जी जारी गरेपछि पक्राउ गर्नका लागि सहयोग गरिदिन भदौ १५ गते वन कार्यालयले प्रहरीलाई पत्राचार गरेको थियो । वनको विषयमा प्रहरीले हस्तक्षेप गर्न नमिल्ने तर सहयोग मागेको खण्डमा प्रहरी सहयोग गर्न तयार रहेको जिल्ला प्रहरी कार्यालय पश्चिम नवलपरासीका सूचना अधिकृत प्रहरी नायव उपरीक्षक रेशम बोहराले बताए । स्थानीय जनप्रतिनिधिहरुलाई विभिन्न कार्यक्रममा सहभागी भएको देखिए पनि वन कार्यालयले फेला पार्न नसकिएको भन्नु लज्जास्पद भएको स्थानीय काशी हरिजनले बताए ।

गण्डक नहर क्षेत्रमा लगाइएका ४९ वटा रुख काटिएको विषय विवादित भएसँगै अदालतबाट पक्राउ पुर्जीसम्म जारी भएको छ । काटिएका रुखहरु प्रतापपूर गाउँपालिका वडा नम्बर ९ को जिम्मामा रहेको छ ।