खोज

गैंडहवा, २९ भदौ ।

५९ औं राष्ट्रिय बाल दिवसका अवसरमा रुपन्देहीको गैंडहवा गाउँपालिका वडा नम्बर ५ मा वक्तृत्वकला प्रतियोगिता सम्पन्न भएको छ ।

विद्यार्थीको अन्तर्निहित क्षमता प्रष्फुटन गर्ने र बोल्ने क्षमताको विकास गर्ने उद्देश्यले “बालबालिकामा लगानीः सुनिश्चित भविष्यको थालनी” भन्ने विषयमा विद्यालय स्तरीय वक्तृत्वकला कार्यक्रम गरिएको हो । वडास्तरीय बाल क्लव र साथी सञ्जाल नामक संस्थाको आयोजनामा भएको वक्तृत्वकला प्रतियोगितामा १७ वटा विद्यालयले भाग लिएका थिए ।

प्रतियोगितामा सिद्ध लुम्बिनी इङलिस बोर्डिङ स्कुलकी अन्जनी गुप्ता प्रथम, विष्णुपुरा माविकी रोसनी यादव द्वितीय, विष्णुपुरा माविकै रोसनी कहाँर तृतीय र दिव्यज्योती इङलिस बोर्डिङ स्कुलकी इन्द्रकला गुप्ता सान्त्वना भएका छन् ।

यसअघि कार्यक्रमको उदघाटन गर्दै गैंडहवा गाउँपालिकाकी उपाध्यक्ष माधुरी जैसवालले बालमैत्री समाजले मात्र बालबालिकाको समुन्नत विकास हुने र उनीहरुको भविष्य उज्ज्वल हुनेभन्दै गाउँपालिकाले बालबालिकाको क्षेत्रमा लगानी बढाइरहेको बताइन् । बाल अधिकार हनन् हुन नदिन र संविधानमा व्यवस्था भए बमोजिम उनीहरुले पाउने अधिकार प्राप्तीका लागि अभिभावकसँगै सिंगो समुदाय पनि सचेत हुनुपर्नेमा उनले जोड दिइन् ।

गाउँपालिकाका प्रमुख प्रशासकीय अधिकृत कृष्णप्रसाद पन्थीले वक्तृत्वकला प्रतियोगिताले बालबालिकामा व्यावहारिक अभ्यास हुने, उनीहरुको सिर्जनात्मक विकास हुने र अधिकारका बारे सचेत हुने मौका पाउने बताए ।

प्रतियोगिता उदघाटनका अवसरमा बोल्दै गैंडहवा गाउँपालिका वडा नम्बर ५ का वडाअध्यक्ष विजयकुमार शर्माले आफ्नो वडामार्फत भए गरेका कामबारे प्रकाश पार्दै वडाबाटै सुत्केरी तथा अन्य बिरामीहरुका लागि निःशुल्क एम्बुलेन्स सेवा सुरु गरिएको, गर्भवती महिलाहरुलाई निःशुल्क भिडियो एक्सरे सेवा र कृष्ण आधारभूत स्वास्थ्य केन्द्रबाट अति गरीब दलितलाई वडाबाट विद्युत मिटरको निःशुल्क व्यवस्था गरिएको जानकारी दिए ।

कार्यक्रममा विष्णुपुरा साथी सञ्जालका कोषाध्यक्ष राजनन्दनी हरिजन, बाल क्लवका अध्यक्ष विश्वास शर्मा, निर्णायक मण्डलका श्रीकृष्ण यादव, सरिता हरिजनलगायतले मन्तव्य व्यक्त गरेका थिए ।