खोज

धनगढी, २६ भदौ ।

कैलालीका दुई होटेलबाट यौन धन्दामा संलग्न दुई जोडी सहित प्रहरीले होटल सञ्चालकलाई पक्राउ गरेको छ । सोमवार बेलुकी सुदूरपश्चिम प्रदेश प्रहरीको आरआइटीको टोली र वडा प्रहरी कार्यालयको टोलीले संयुक्तरुपमा छापा हान्दा धनगढी चटकपुरमा यौन धन्दा सञ्चालन गरिरहेको पहाडगंज होटलका सञ्चालक लक्ष्मण खड्का सहित एक जोडीलाई प्रहरीले पक्राउ गरेको छ ।

यौन धन्दा सञ्चालन भइरहेको भन्ने सूचनाका आधारमा छापा हान्दा २४ वर्षीया युवती र २१ वर्षीय युवक रंगेहात पक्राउ परेको वडा प्रहरीका कार्यालय प्रमुख प्रहरी निरीक्षक जनक ढुङ्गानाले जानकारी दिए ।

उनका अनुसार पक्राउ परेकी युवती होटल सञ्चालक खड्काले जागिरमा राखी यौन धन्दा चलाइरहेकी हुन भने युवक ग्राहक हुन् ।

यस्तै धनगढी चौराहास्थित स्वागत होटलबाट पनि प्रहरीको टोलीले रंगेहात एक जोडी समातेपछि होटल सञ्चालक डेजी प्रसाद जोशीलाई पनि पक्राउ गरेको छ । यौन धन्दामा संलग्न २८ वर्षीया युवती र ग्राहक बनेर गएका २५ वर्षीय युवक रंगेहात समातिएका थिए । धनगढीमा खुल्लेयाम यौन धन्दा चलाइरहेका पहाडगंज होटलका सञ्चालक खड्का र स्वागत होटलका सञ्चालक जोशीमाथि थप अनुसन्धान भइरहेको छ ।