खोज

बुटवल, २३ भदौ ।

बल्कोट अर्घाखाँची – रुपन्देही सम्पर्क समाजको आयोजनामा तिज मिलन कार्यक्रम सम्पन्न भएको छ ।

समाजको स्थापनादेखि विभिन्न समयमा विविध कार्यक्रम गर्दै आएकोमा आगामी दिनमा यस्ता कार्यक्रमहरु जन्मभूमि बल्कोटमा नै पुगेर गर्नको लागि छत्रदेव गाउँपालिका वडा नम्बर ३ का अध्यक्ष तेज प्रसाद खनालले अनुरोध गरेका थिए । गाउँमा बाँदर र बँदेल आतंक तीव्र गतिमा फैलिएको र यसलाई समाधान गर्नका लागि शहर केन्द्रित भएको बौद्धिक जनशक्तिको सहयोगको अपेक्षा सिङ्गो पालिकाले गरेकोले समाधानका उपाय खोजी गरेर मातृभूमि फर्किन उनको अपिल थियो ।

कार्यक्रममा राष्ट्र बैंक सिद्धार्थनगरका उप निर्देशक जीवन प्रकाश पाण्डेले यसप्रकारका कार्यक्रम सधैंभरि गरिरहन र संस्कार नयाँ पुस्तामा हस्तान्तरण गर्ने कार्यमा लाग्नुपर्नेमा जोड दिएका थिए । समाजका निवर्तमान अध्यक्ष दिपक पन्थीले आफ्नो शुभकामना मन्तव्य दिदै तिजको पर्वको मौलिकतामा आधुनिकता भित्रिएको र यसले नेपाली समाजमा चरम पुँजीवादी व्यवहारको विकास गरेकोले यस्ता कार्यक्रम मार्फत गलत तत्वलाई निस्तेज पार्नु पर्नेमा जोड दिएका थिए । कार्यक्रममा सस्थाका वरिष्ठ उपाध्यक्ष विष्णु प्रसाद पौडेलले पनि मन्तव्य व्यक्त गरेका थिए ।

कार्यक्रममा आजीवन सदस्यहरु, विभिन्न विषयगत उपसमितिहरु, निवर्तमान कार्य समितिलाई सम्मान पत्रबाट सम्मान गरिएको थियो । कार्यक्रममा राष्ट्रिय कलाकार दिपु मगर र कल्पना कुसुमले सांस्कृतिक प्रस्तुति मार्फत उपस्थित सम्पूर्ण दिदिबहिनीहरुलाई छमछमी नचाएका थिए । कार्यक्रममा प्रथम उपाध्यक्ष रुपलाल पन्थी, महिला उपसमिति संयोजक मञ्जु भुसाल पन्थी, सल्लाहकार नवराज श्रेष्ठ, कोषाध्यक्ष हरि न्यौपाने लगायतले तिज पर्वको शुभकामना मन्तव्य दिएका थिए ।

समाजले जन्मभुमि प्रतिको आफ्नो उत्तरदायित्व कहिल्यै नभुल्ने र आगामी दिनमा बल्कोटमा विशेषज्ञ सहितको स्वास्थ्य शिविर सञ्चालन गर्ने र त्यहाँको कृषि उत्पादनलाई बजारीकरण गर्नका लागि सधैं प्रयत्नशील रहेको अध्यक्ष मोहन भट्टराईले बताए । त्यस अवसरमा सचिव समाजसेवी धुर्व सापकोटा,कार्यक्रम संयोजक सस्थाका कोषाध्यक्ष हरि न्यौपाने लगायतले पनि बोलेका थिए ।