खोज

बुटवल, ८ भदौ । महिला शसक्तिकरणको अभियान अन्तरगत लायन्स क्लव अफ बुटवल सयपत्रीले गृहिणी महिलाहरुलाई धुप बनाउने तालिम दिएको छ । आर्थिक समृद्धि हुदै महिला शसक्तिकरण हुने भन्दै क्लबले ३ दिने निःशुल्क बाटेको धुप बनाउने तालिम प्रदान गरेको हो ।
तालिमको विहिबार एक समारोहका बिच लायन्स डिष्ट्रिक ३२५ ‘पी’ डिष्ट्रिक गर्भनर अर्जुनमान सैजुले शुभारम्भ गर्दै सीप सिकेर स्वरोजगार बन्न सफल हुने गरि महत्वपूर्ण तालिम भएको बताए । घरेलु कामकाजमा ब्यस्त महिलाहरुलाई थोरै समय उपयोग गरेर आयआर्जन हुने रुपमा तालिम गरिएको बताए । कार्यक्रमका फष्ट भिडिजि पुरुषोत्तमभक्त प्रधानाङ्गले महिलाहरुको आयआर्जनमा मद्यत मिल्ने गरि दिइएको तालिमलाई थप सहयोग गर्ने प्रतिवद्धता जनाए ।
कार्यक्रममा लायन्स क्लव बुटवल सयपत्रीका अध्यक्ष सृजना श्रेष्ठले बुटवल उपमहानगरपालिका वडा नं ९, ११ मा बसोबास गर्ने १७ बर्ष देखि ४५ बर्ष उमेर समुहका ३ दर्जन महिलाहरुलाई धुप बनाउने तालिम दिईएको बताईन । मिलनचौक शिवपथस्थित शिवालय परिसरमा आयोजना गरिएको तालिमबाट स्वरोजगारी बन्ने दाबी गरिन ।
क्लवका सचिव रिना भारीले बजारमा धेरै माग भएको बाटेको धुप बनाएर गृहणी महिलाहरुलाई आयआर्जनमा सहयोग प्रदान गर्ने गरी निःशुल्क तालिम प्रदान गरिएको बताईन । तालिम संयोजक तथा पुर्व सिनिययर डिष्ट्रिक एड्भाईजर तथा प्रशिक्षक सविना श्रेष्ठले बाटेको धुपको बजारमा माग समेत राम्रो रहेको बताईन । उनले अहिले बजारमा १ मुठा १० पिसको धुपको १२ रुपैयाँमा, ठुलो प्याकेटमा १ सय २० रुपैयाँमा होलसेलमा विक्रि हुदै आएको बताईन । तालिममा तितेपाती सहकारी संस्थाका अध्यक्ष कमला बस्नेत कुँवर र शिवालय मन्दिर विकास समितिका अध्यक्ष गौरा केसीले संस्थागत रुपमा सामाजिक कार्यका साथै महिला शसक्तिकरणका कार्यक्रममा सहकार्य गर्दै अघि बढ्ने बताईन ।