खोज

बुटवल, ३ भदौ । नेपाली कांग्रेसका महामन्त्री गगन थापाले ललिता निवास जग्गा प्रकरणमा पूर्व प्रधानमन्त्रीद्वय माधव कुमार नेपाल र डा बाबुराम भट्टराईको बयान नलिने प्रपञ्च भएको भन्दै आपत्ति जनाएका छन् ।

गठबन्धनका नेताहरु बैठक बसेर कसैको बयान लिने नलिने निर्णय गर्न नसक्ने उनले बताए । आइतबार झापाको शिवसताक्षीमा आयोजित कार्यक्रममा उनले गठबन्धनको बैठक लाइभ गर्नुपर्ने बताए ।
बैठक हुनुअघि र पछि व्यक्त विचारमा फरक फरक भाषा देखिने गरेको उनले बताए ।

नक्कली सुन प्रकरणको अनुसन्धान प्रक्रियालाई अघि बढाइरहेका प्रहरी अधिकारीको सरुवाप्रति पनि उनले असन्तुष्टि व्यक्त गरेका छन् । सुशासनको काम गरिरहेको भनि प्रशंसा पाइरहेको बेलामा प्रहरी अधिकारीहरुको सरुवा गलत भएको उनको भनाई छ । सुन काण्डमा राज्यले गरेको अनुसन्धान चित्त नबुझेको एमालेले भनिरहे पनि राज्य निकायहरु अनुसन्धान गर्न सक्षम रहेको उनले दाबी गरे ।

भ्रष्टाचारका फाइल खोल्ने विषयमा दलहरुले बदलाको रुपमा लिएको थापाले बताए ।

यति, ओम्नी, गिरीबन्धु टी स्टेट, ललिता निवास, सुन काण्ड, शिविर घोटला लगायत सबै भ्रष्टाचारको फाइल खोल्नुपर्ने उनले बताए ।

व्यक्ति भ्रष्टाचारमा संलग्न हुन्छ भने त्यो उसको निजी कुरा हुने उनले बताए । माथि बस्ने एउटा नेताले गरेको गल्तिको भारी तल बस्ने कार्यकर्ताले पनि बोक्नुपरेको उनले सुनाए । उपल्लो तहमा रहेको नेताले गरेको भ्रष्टाचारका कारण तल्लो तहमा रहने कार्यकर्ताले दश ठाउँमा दश थरी कुरा सुन्नुपरेको थापाले बताए ।