खोज

बुटवल, १ भदौ । रुपन्देहीको कोटिहवास्थित पांचतारे होटेल टाइगर प्यालेस रिसोर्टको नयां व्यवस्थापनले बन्द रहेको क्यासिनो दुई महिनाभित्र सञ्चालनमा ल्याउने जनाएको छ ।
गैर आवासीय नेपालीहरुको लगानी रहेको हिमालयन टाइगर इन्भेस्टमेन्ट इंकले १५ मिलियन डलरमा टाइगर प्यालेस रिसोर्टलाई हालै खरिद गरेको हो । १५ बिघा क्षेत्रफल ओगटेको रिसोर्ट लुम्बिनी प्रदेशकै पहिलो पांचतारे होटेल हो ।
नयां व्यवस्थापनले शुक्रबार रिसोर्टमै पत्रकार सम्मेलन गरी दुई महिनाभित्र क्यासिनो सञ्चालनमा ल्याउने गरी काम गरिरहेको कम्पनीका अध्यक्ष बुद्धिसागर सुवेदीले बताए । १५ मिलियनमा खरिद गरेपनि बांकी बक्यौता र दायित्व समेत जोड्दा करिब ४ अर्ब लगानी पुग्ने सुवेदीले बताए । हाल रिसोर्ट आंशिकरुपमा चलेपनि क्यासिनो भने लामो समयदेखि बन्द छ ।
‘रिसोर्ट खरिद गरेपछि क्यासिनो पूर्ण क्षमतामा सञ्चालन गर्ने हाम्रो प्राथमिकतामा छ’–सुवेदीले भने–‘क्यासिनोले तिर्न बांकी सबै कर तिरेर ६० दिनभित्र सञ्चालनमा ल्याउने हाम्रो लक्ष्य छ ।’
सीमावर्ती भारतको उत्तर प्रदेशका विभिन्न शहरका पर्यटकलाई क्यासिनोमा आकर्षित गर्न सकिने नयां व्यवस्थापनको विश्वास छ ।
नेपालको कानुनअनुसार सरकारलाई बुझाउर्ने कर र र दायित्व सबै तिर्न तयार रहेको उनले बताए । उनका अनुसार कर र बैंक ऋण समेत सवा २ अर्ब रुपैयां रिसोर्टले तिर्नुपर्ने दायित्व रहेको छ ।
अस्ट्रेलियन सिलभर हेरिटेज ग्रुपले करिब पाँच अर्ब लगानीमा नेपालकै ठूलो क्यासिनोसहितको रिसोर्ट सञ्चालनमा ल्याएको थियो । तर, कोभिड महामारी र लगानीकर्ताबीच आन्तरिक विवादका कारण केही वर्षदेखि रिसोर्ट पूर्णरूपमा सञ्चालनमा आउन सकेको थिएन ।
रिसोर्टमा भएको बैंक ऋणको दायित्व र अन्य व्यावसायिकका कारण आर्थिकरुपमा जर्जर भएको रिसोर्ट सञ्चालन गरी रोजगारी सिर्जना,पर्यटन क्षेत्रमा योगदान र नेपालमा लगानीको वातावरण छ भन्ने सन्देश दिन आफूहरुले रिसोर्ट खरिद गरेको सुवेदीले प्रष्ट्याए ।
जग्गा सट्टाभर्ना लगायत रिसोर्टसंग केही विवादित विषय भएपनि नयाँ व्यवस्थापनले कानुन र अदालतको आदेश मानेर अघि बढ्ने सुवेदीले बताए ।
क्यासिनोसहित रिसोर्ट पूर्ण क्षमतामा सञ्चालन हुँदा एक हजारभन्दा बढीले प्रत्यक्ष रोजगारी पाउने र राज्यले वार्षिक करोडौँ राजस्व प्राप्त गर्ने भएकाले सरकारी निकायले विवादित विषय समाधानमा सहयोग गर्नुपर्ने रिसोर्टका निर्देशक दीपक गौतमले बताए ।
यसअघिको विदेशी व्यवस्थापन स्थानीय समुदायसंग राम्ररी घुलमिल नहुंदा समस्या उत्पन्न भई रिसोर्ट धराशायी भएकाले त्यसबाट पाठ सिकेर आफूहरुले स्थानीयसंग समन्वय र सहकार्य गरेर अघि बढ्ने गौतमले बताए ।