खोज

कपिलवस्तु, १ भदौ । कपिलवस्तुको ईलाका प्रहरी कार्यालय पकडीका प्रहरी निरिक्षक शिवकुमार क्षेत्रीलाई कारवाहीको माग गर्दै मायादेवी गाउँपालिकाका जनप्रतिनिधीले ज्ञापनपत्र बुझाएका छन । नागरिकलाई सास्ती दिनुका साथै आफुहरूलाई दुव्र्यवहार गरेको आरोप सहित निरिक्षक क्षेत्रीलाई कारवाही माग गर्दै पालिकाका अध्यक्ष, वडा अध्यक्षहरू प्रशासन कार्यालयमा पुगेका हुन । मायादेवी गाउँपालिकाका अध्यक्ष वलिउद्दिन मुसलमान, प्रदेशसभा सदस्य मधुसुदनशरण चौधरी, वडा अध्यक्षहरू शैलेन्द्र कुमार यादव, राघवेन्द्र प्रसाद पाण्डेय लगायतका जनप्रतिनिधीले प्रमुख जिल्ला अधिकारी शंकरहरी आचार्य मार्फत केन्द्रिय गृहमन्त्री र लुम्बिनी प्रदेश प्रहरी कार्यालयलाई ज्ञापनपत्र बुझाएका हुन ।

ज्ञापनपत्र बुझाउने कार्यमा एक्यबद्धता जनाउन जसपाका प्रदेश नेता अब्दुल रसिद खाँ, एमाले नेता कैलाश अग्रहरी समेत प्रशासन कार्यालयमा पुगेका थिए । जिल्ला प्रशासन कार्यालय मार्फत जनप्रतिनिधीले गृहमन्त्रीलाई बुझाएको ज्ञापनपत्रमा साउन २८ गते जनगुनासो आए पछि ईलाका प्रहरी कार्यालयमा पुगेका अध्यक्ष सहितका जनप्रतिनिधीलाई निरिक्षक क्षेत्रीले दुव्र्यवहार गरेको उल्लेख छ । चेकजाँचका क्रममा बर्षातका बेला पनि बालबालिका सहित भएका महिलाहरूलाई सवार सवारी साधनलाई अनावश्यक दुखः दिएको उल्लेख गर्दै सो कार्यको घोर बिरोध गर्ने जनाईएको छ । अध्यक्ष र वडा अध्यक्षको संयुक्त हस्ताक्षर सहित बुझाईएको ज्ञापनपत्रमा आम नागरिकलाई अभद्र व्यवहार गर्ने तथा आफुहरू माथी दुव्र्यवहार गर्ने निरिक्षक क्षेत्रीलाई कारवाही नगरिए आफुहरू चरणबद्ध आन्दोलनमा जाने चेतावनी दिईएको छ । आफुहरू माथी दुव्र्यवहार गरेका निरिक्षक क्षेत्रीले बिभिन्न स्थानमा गएर स्थानियलाई भड्काएर आफुहरू बिरुद्ध उचाल्ने कार्य गर्दै आएको जनप्रतिनिधीहरूले आरोप लगाए ।

ज्ञापनपत्र बुझदै कपिलवस्तु जिल्लाका प्रजिअ शंकरहरी आचार्यले ज्ञापनपत्र सम्बन्धित निकायमा प्रेषित गर्ने प्रतिबद्धता जनाए । घटना बारे समयमै जानकारी गराएको भए समस्या तत्कालै समाधान गर्नको लागि आवश्यक बिकल्प खोज्न सकिने अवस्था रहेको प्रजिअ आचार्यको भनाई थियो । निरिक्षक क्षेत्री असुली धन्दामा लिप्त भएको र जनतालाई नियतबस दुखः दिदै आएको मायादेवी गाउँपालिका वडा नम्बर ३ का अध्यक्ष शैलेन्द्र कुमार यादवले आरोप लगाए । निरिक्षक क्षेत्रीलाई कारवाही नभए जनप्रतिनिधी र जनसमुदायले शसक्त आन्दोलन गर्न बाध्य हुने उनले जानकारी दिए । निरिक्षक क्षेत्रीले गरेको अपमानजनक व्यवहारले आफुहरूलाई दुखी बनाएको बताउदै आफुहरू निजलाई आवश्यक कारवाहीका लागि ज्ञापनपत्र दिन आएको गाउँपालिका अध्यक्ष वलिउद्दिन मुसलमानले बताए ।