खोज

बर्दघाट, २३ साउन ।  बर्दघाट नगरपालिकाको मुख्य बजार क्षेत्रमा सिसि क्यामेरा जडान गरी नगरको निगरानी सुरु गरिएको छ ।
नगर क्षेत्रमा हुनसक्ने सम्भावित आपराधिक क्रियाकलाप रोक्न र नगरबासीलाई सुरक्षाको प्रत्याभूति दिलाउन सिसि क्यामेरा जडान गरी सुक्ष्म निगरानी थालिएको हो ।

बर्दघाट नगरपालिकाले नगरको मुख्य बजार क्षेत्र वडा नम्बर ४ को बर्दघाट बजार क्षेत्र, वडा नम्बर २ को चिसापानी बजार क्षेत्र, वडा नम्बर ९ र १० को पञ्चनगर बजार, वडा नम्बर ७ को जिमिरेभार र वडा नम्बर १२ को भटौलिया बजार क्षेत्रलाई लक्षित गरी ५२ वटा क्यामेराबाट निगरानी गरिरहेको छ । बर्दघाट नगरपालिकाले आर्थिक वर्ष २०७९/०८० मा सिसि क्यामेरा जडान शीर्षकबाट १५ लाख बजेट विनियोजन गरी कार्य प्रारम्भ गरेको बर्दघाट नगरपालिकाका सूचना अधिकारी पुष्कर काफ्लेले जानकारी दिए ।

पहिलो चरणमा नगरको मुख्य बजार क्षेत्रमा क्यामेरा जडान गरिएको र आगामी वर्षहरूमा थप सम्बेदनशील क्षेत्र र अन्य बजार क्षेत्रमा समेत क्यामेरा जडान गरी नागरिकलाई सुरक्षाको प्रत्याभूति दिलाइने बर्दघाट नगरपालिकाका नगर प्रमुख शम्भुलाल श्रेष्ठले बताए ‘स्थानीय सरकार आफ्ना नागरिकको जनधनको सुरक्षामा संवेदनशील छ, सिसि क्यामेरा जडानले आपराधिक क्रियाकलापमा न्यूनीकरण त ल्याउँछ नै यदि कुनै चोरी वा अपराध भएमा दोषी पक्राउ गर्न समेत सहजता ल्याउँछ’ नगर प्रमुख श्रेष्ठले भने ।

सि सि क्यामेरा जडान गरिसकेपछि हुनसक्ने सम्भावित आपराधिक घटना न्युनिकरण हुने र राजमार्गमा दुर्घटना भइहालेमा पनि दोषि पत्ता लगाउन सहज हुने इलाका प्रहरी कार्यालय बर्दघाटका प्रमुख प्रहरी निरिक्षक विरेन्द्र के.सी. ले जानकारी दिए । ‘बर्दघाट नगरका अधिकांश क्षेत्र सुरक्षा दृष्टिकोणले संवेदनशिल क्षेत्रका रूपमा रहेका छन, लागूपदार्थ दुब्र्यसनी र ओसारपसार लगायत बेलाबेलामा आपराधिक कृयाकलाप पनि हुँदै आएका छन, क्यामेरा जडान पछि आपराधिक मनोवृत्ति भएकाहरूको आत्मबल कमजोर हुने र कुनै अपराध भैहाले पनि अपराधी पत्ता लगाउन सहज हुन्छ र यसको मोनिटरिङ २४ सै घण्टा इलाका प्रहरी कार्यालयले गरेको छ’ प्रहरी निरिक्षक के.सी ले भने ।

बर्दघाट नगरपालिकाको मुख्य बजार क्षेत्रको करिव ५ किलोमिटर क्षेत्र पूर्व पश्चिम राजमार्ग रहेको छ । नगर क्षेत्रमा कुनै पनि सवारीले दुर्घटना गराएर ‘हिट एण्ड रन’ को सम्भावनाको अन्त्य भएको ट्राफिक प्रहरीको भनाइ छ । बजार क्षेत्रमा सि सि क्यामेराले निगरानी गर्न थालेपछि चोरीका घटनामा कमी आउने बर्दघाटमा सुनचाँदी ब्यवशाय गर्दै आएका सुनचाँदी ब्यवशायी सँघ बर्दघाट नगरसमितिका सल्लाहकार राजेन्द्र सुनारले बताए । समग्र नगरकै निगरानी भएपछि आम नागरिकसँगै ब्यवशायीलाई पनि सुरक्षाको प्रत्याभूती भएको छ’ सुनारले भने ।

बर्दघाट नगरपालिकाको नगर सुरक्षाको निम्ति नगर प्रहरी समेत रहेका छन । ‘ ९ जना नगर प्रहरी रहेको बर्दघाट नगरमा हुन सक्ने अवान्छित क्रियाकलाप रोक्न पर्याप्त जनशक्ति छैन, सि सि क्यामेराले नगर प्रहरीको कामको चापलाइ समेत केहि हदसम्म न्युनिकरण गरेको छ ।’ नगर प्रहरी प्रमुख पिताम्बर सापकोटाले भने ।