खोज

गुल्मी, ११ साउन।  गुल्मीको रेसुंगा नगरपालिका–८ थुम्का गाउँकी १२ बर्षीया रचना विकको उपचारमा आर्थिक समस्या आइपरेको छ । उपचारमा पैसा अभाव भएपछि परिवार यतिबेला मनकारीहरूसँग सहयोगको याचना गरिरहेका छन । रचना विक आगोमा जलेर सख्त घाईते भएको पनि डेढ महिना पुग्यो । परिवारको आर्थिक अबस्था अत्यन्तै कमजोर भएका कारण छोरीको उपचार गर्न नसेपछि बुबा दुर्गा बहादुर विकले अस्पतालको बेडमा बसेर छोरीलाई बाचाईदिन आग्रह गर्दै आएका छन् ।

स्थानीय सिद्धबाबा माध्यमिक विद्यालयमा अध्ययनरत रचना कक्षा छ मा पढ्छिन । उनी गत जेठ २९ गते बिहानै नास्ता खाने क्रममा अगेनोबाट एक्कासी कुर्तामा आगो सल्किपछि जलेर सख्त घाईते बनेकी हुन । उक्त समयमा बुबा दूर्गा बहादुर विक काममा निस्किएका थिए भने आमा राधिका घाँस दाउरा लिन जंगल गएकी थिइन् । अचानक कुर्तामा आगो सल्कीएपछि रचनाले चिच्याउँदै गुहार मागिन । त्यो समयमा पानीको अभावका कारण घरमा खानेपानी समेत थिएन । उनले जिउमा लागेको आगो निभाउन पानी समेत भेटिनन् । केहिबेर त छिमेकीले दिदीभाइको झगडा सम्झिए । तर, रचना आगोले जलेर विक्षिप्त थिइन् । उनको शरीरमा लागेको आगो फुपू र हजुरआमाले निभाएपछि रचनालाई लगत्तै गुल्मी अस्पताल पुर्याईयो  । तर, अवस्था जटिल भएको भन्दै अस्पतालले पाल्पा अस्पतालमा रेफर गर्यो।

जनतन बाबु दूर्गाबहादुरले ऋणधन गरेर छोरीलाई पाल्पा पुराए । उनको नौ दिनसम्म त्यहाँ उपचार भयो । तर, सानो उमेर र भोलिको भविष्यका कारण अस्पतालले काठमाडौंको राम्रो ठाउँमा लैजान सुझाव दियो । त्यही सुझाव अनुसार दूर्गा बहादुरका दम्पतीले छोरीलाई काठमाडौंको सुष्मा कोइराला मेमोरियल अस्पतालमा लगेर उपचार गरिरहेका छन् । पाल्पाको उपचारमा ऋण खोजेर लागेको ५० हजार सकियो । पाल्पाबाट काठमाडांैसम्म एम्बुलेन्समै लैजाँदा ३५ हजार भन्दा बढी रकम सकियो ।

उनको सुष्मा कोइराला मेमोरियल अस्पतालमा अप्रेशन गरियो । अप्रेसन गर्दा पनि डेढ लाख रकम खर्च भयो । बालिका र परिवारको अवस्था देखेर रुटिन अफ नेपाल बन्दका उज्जल बिक्रम थापाले एक लाख सहयोग गरे । अझै विक परिवारको थाप्लोमा ४० हजार ऋण छ । त्यो बाहेक खानपान, औषधी उपचार र बसाइँको व्यवस्था गर्न निकै मुस्किल परिरहेको आमा राधिका विकले दुःख सुनाईन ।

दुर्गाबहादुर विकले मजदुरी गर्छन् । परिवारको खुसीको लागि ०७१ सालमा मलेसिया पनि गए । मलेसिया पुगेको ११ महिनामै कम्पनी बन्द भएकाले फर्किएर घर आए । काम र दाम भने अनुसार नपाएका विकको गाउँमा खोजेको ऋण समेत तिर्ने उपाय भएन । सम्पतीको नाममा खग्रेटाले बारेको छाप्रो हो । गत बर्ष जनता आवासबाट घर प¥यो । राम्रो ओतको आशमा विक परिवार खुसी भए । पहिलो किस्ता ३५ हजार पाए । थप किस्ता पाउने आशमा विकले लालपुर्जा धितो राखेर पाँच लाख ऋण निकालेका छन् ।

सरकारले कवुल अनुसारको किस्ता दिएको छैन् । अहिलेनै छोरी जलेर अस्पतालको बेडमा छन् । ‘ऋण माग्न लालपुर्जा बुझाए सरकारले किस्ता नदिदाँ घरका भित्ता र झ्यालढोकामा लेउ उम्रियो । छोरी जलेर अस्पतालमा छटपटाइरहेकी छ,’ उनले भने ।’ जलेर घाइते बनेकी रचना विक परिवारकी जेठी छोरी हुन् । उनको उपचारको लागि अहिले उनी अध्धयनरत बिद्यालय र समुदाय स्तरमा चन्दा संकलन भइरहेको छ । लामो समय उपचार हुने भएकाले परिवारसंग आर्थिक संकट देखिएको छ । काम गरेर खाने परिवारमा छोरी जलेर सख्त घाइते भएपनि अवस्था झनै बिकराल बनेको छ । मनकारी मनहरूको सहयोग पाएमा छोरीले पुर्नजीवन पाउने आशा राखेको गहभरी आँसु टिल्पीलाउँदै विक परिवारले आशा राखेका छन् ।