खोज

तिलोत्तमा, ११ साउन ।

कवि लेखनाथ ज्ञवालीको १३ औं स्मृति दिवस, स्रष्टा सम्मान, कृति विमोचन तथा साहित्यिक कार्यक्रम सम्पन्न भएको छ ।

कवि लेखनाथ ज्ञवाली स्मृति प्रतिष्ठान नेपालको आयोजनामा तिलोत्तमाको शङ्करनगर वन विहार पुष्पलाल भवनमा आयोजित कार्यक्रममा कवि लेखनाथ ज्ञवाली वाङ्मय पुरस्कारबाट साहित्यकार तथा समालोचक बालकृष्ण भट्टराईलाई रु. १५ हजार नगद र सम्मान पत्र तथा कुन्तादेवी नारी प्रतिभा पुरस्कारबाट गुल्मीका नवोदित प्रतिभा सरु सुधालाई नगद रु सात हजार सहित सम्मान पत्रबाट सम्मानित गरिएको छ ।

त्यस्तै प्रतिष्ठानका जेष्ठ सल्लाहकार मोदनाथ प्रश्रित, अर्जुन ज्ञवाली र मदन पौडेललाई दोसल्ला सहित सम्मान गरिएको थियो । कार्यक्रममा प्रतिष्ठानका अध्यक्ष रम्भा पौडेल, प्रा डा.कपिलदेव लामिछाने, साहित्यकार रुद्र ज्ञवालीलगायतले मन्तव्य व्यक्त गरेका थिए ।

कार्यक्रममा लेखनाथ ज्ञवालीद्वारा रचित आधुनिक भजन सङ्ग्रह र प्रतिष्ठानका संरक्षक लक्ष्मण ज्ञवालीको कोरोना सवाई विमोचन गरिएको थियो । विमोचित भजन सङ्ग्रहमाथि साहित्यकार उत्तमकुमार पराजुली तथा कोरोना सवाइको डा. हिरण्यलाल ज्ञवालीले समीक्षा एवं टिप्पणी गरेका थिए । लक्ष्मण ज्ञवाली र सुशीला ज्ञवालीले सांगेतिक प्रस्तुती दिएका थिए । लेखनाथ ज्ञवालीको व्यक्तित्व र कृतित्वमाथि सन्तोष ज्ञवालीले प्रकाश पारेका थिए ।

कार्यक्रममा कवि लेखनाथ ज्ञवालीका भजन, भजन समूहद्वारा प्रस्तुत गरिएको थियो भने विविध स्रष्टाहरूले रचना वाचन गरेको बाल साहित्यकार तथा कवि लेखनाथ ज्ञवाली स्मृति प्रतिष्ठानका सदस्य मञ्जु ज्ञवाली पौडेलले बताइन् । कवि ज्ञवाली रेडियो लुम्बिनीका संस्थापक, सम्पादक थिए । उनका दशैको आशिक, साथी, खडेरी, माटाका गीत, नानी , अक्षर, हाम्रा अवाजहरू, टाइँटुर्लुक टाइँटुर्लुक र आधुनिक भजन सङ्ग्रह प्रकाशित छन् ।