खोज

चन्द्रौटा(कपिलवस्तु), ५ साउन ।

कपिलवस्तुको शिवराज आधारभूत अस्पतालले २४ घण्टे प्रसुति सेवा सञ्चालनमा ल्याएको छ । शिवराज नगरपालिकामा घरमा प्रसुति शुुन्य गराई गर्भावती आमा र शिशु मृत्युदर न्यून गर्न प्रसुति सेवा शुक्रबार सञ्चालन ल्याइएको नगर प्रमुख थापाले बताए ।

आधारभूत अस्पतालमा सेवा थप भएपछि पालिकामा प्रसुति सेवा सञ्चालन हुने छैठो संस्था बनेको नगरपालिकाले जनाएको छ । यस अगाडी शिवपुर, विरपुर, चनई, थुन्हिया, शिवगढी स्वास्थ्य चौकीमा प्रसुति सेवा सञ्चालन रहेको नगर उप–प्रमुख शिवकुमारी थारुले बताईन् ।

अस्पतालमा ४ वेडको उत्तर प्रसुति कक्ष र २ वेडको पूर्व प्रसुति कक्ष रहेको अस्पतालका प्रमुख लेखनाथ पौडेलले बताए । उनका अनुसार अस्पताल सञ्चालनका लागि पालिकाले २ मेडिकल अफिसर, १ रेडियो ग्राफर सहित ७ जना स्वास्थ्यकर्मीको दरवन्दी थप गरेको छ । स्वास्थ्यकर्मी व्यवस्थापनका लागि पालिकाले आन्तरीक आम्दानीबाट बजेट विनियोजन गरेको छ ।

यस्तै अस्पताल सञ्चालक समिति अध्यक्ष समेत रहेको वडा नम्बर ५ का अध्यक्ष नेत्र प्रसाद बेल्वासेल अस्पतालले एक महिना भित्र सुरक्षित गर्भ पतन सेवा समेत सुचारु गर्ने तयारी गरेकोे बताए । आधारभूत अस्पतालमा ओपिडी सेवा, ,मुटुको जाँच गर्न इसिजी सेवा, भिडियो एक्सरे सेवा, एक्सरे सेवा, प्रयोगशालासेवा समेत सञ्चालनमा अस्पताल व्यवस्थापन समितिले जनाएको छ ।