खोज

नवलपरासी, ३१ असार–  महेशपुर भन्सार नाकामा प्लान्ट क्वारेन्टाईन स्थापनाका लागि पहल गर्न माग गरिएको छ । हाटबजार जिल्ला समन्वय सिमितिले जिल्ला समन्वय समिति (जिसस) लाई ज्ञापनपत्र बुझाएर यसको माग गरेको हो । जिल्लाको महेशपुर नाकामा मुल भन्सार कार्यालय स्थापना भएको बर्षाै वितिसक्दा पनि हालसम्म प्लान्ट क्वारेन्टाईनको ब्यवस्थापन नहुँदा स्थानीय ब्यवसायी तथा उपभोक्ता मर्कामा परेका छन् ।

सरोकारवाला निकायसँग पहल गरि प्लान्ट क्वारेन्टाईनको ब्यवस्थापन गर्न जिसस प्रमुख भगौती प्रसाद यादवलाई हाटबजार जिल्ला समन्वय समितिका अध्यक्ष राधेश्याम अग्रहरीले ज्ञापनपत्र बुझाएका थिए । मुल भन्सार नाका तत्कालिन अर्थमन्त्री डा.युवराज खतिवडाले शुभारम्भ गरेका थिए । तर हालसम्म भन्सार विभागले सो भन्सार नाकामा प्लान्ट क्वारेन्टाईन सञ्चालनमा ल्याउन सकेको छैन् । जसले गर्दा किसानलाई विउँ विजन, तरकारी लगायतका बनस्पतीजन्य पदार्थको क्वारेन्टाईन चेक नभएको कारण देखाउँदै भन्सार हुन सकिरहेको छैन् । यसले गर्दा चोरी पैठारी भई नेपाल भित्रिने तरकारीमा विषादीको मात्रा परिक्षण हुन सकिरहेको छैन् ।

नेपाली उपभोक्ता विषादी युक्त तरकारी खान बाध्य छन् । भन्सार नहुँदा राजस्व ह्रास भइरहेको छ, उनले भने–भन्सार गराएर स–सानो ब्यपार ब्यवसाय गर्ने ब्यवसायीले ब्यवसाय गर्न नपाउँदा रोजगारीको समेत सृजना हुन सकिरहेको छैन् । हाटबजारमा तरकारी आपूर्ति पर्याप्त मात्रामा आउन नसक्दा तरकारीको मूल्य पनि आकासिँदै जाँदा उपभोक्ता मूल्यवृद्धिको मारमा छन् । यसरी एउटा सामान्य क्वारेन्टाईन ब्यवस्थापनका लागि कर्मचारी नराख्दा अबैध तरकारी पैठारी, विषादीयुक्त तरकारी खानु पर्ने बाध्यता, राजस्व ह्रास र रोजगारीमा प्रतिकूल असर पर्नुका साथै तरकारीमा मूल्यवृद्धि जस्ता समस्या भइरहेका छन् । यी समस्यालाई मध्यनजरमा राखेर जिससले सम्बन्धित सरोकारवाला निकायसँग पहल र समन्वय गरि क्वारेन्टाईन सञ्चालनका लागि पहल गर्न आग्रह गरेको थियो ।

ज्ञापनपत्र बुझदै जिसस प्रमुख यादवले आफ्नो तर्फबाट पटक पटक कुरा उठाउदै आएको र अहिले हाटबजार जिल्ला समन्वय समितिले पनि ज्ञापनपत्र मार्फत ध्यानाकर्षण गराएको प्रति धन्यवाद दिदै जिससले पुनःक्वारेन्टाईनका विषय सरोकारवाला निकाय समक्ष राख्ने प्रतिवद्धता जनाएका थिए ।