खोज

बुटवल, २९ असार ।

नेपालको शिक्षाको पाठ्यक्रमले देश र समाजको बेवास्ता गर्दै विदेश जान लालायित हुने जनशक्ति तयार गरिरहेको भन्दै बुटवल उपमहानगरपालिकाका मेयर खेलराज पाण्डेले चिन्ता व्यक्त गरेका छन् ।

कालिका मानवज्ञान माबिद्वारा आयोजित शैक्षिक गुणस्तर अभिवृद्धि तालिममा बोल्दै मेयर पाण्डेले पाठ्यक्रम र पुस्तकमा आधारित ज्ञानलाई मात्र उपलब्धि ठान्ने प्रवृत्तिले गर्दा विद्यार्थीहरुमा संस्कार, नैतिकता र चरित्रमा स्खलन आएको बताए । विद्यालयमा अध्ययन पूरा गर्दा पनि विद्यार्थीले कुनै सीप सिक्न नसकी अदक्ष कामदारको रुपमा बिदेश जानू पिडादायी व्यवहार भएकोमा सबैलाई चिन्तित बनाएकोले बुटवललाई सीप र संस्कारयुक्त शिक्षा हासिल गर्ने थलो बनाउन बुटवल उपमहानगरले नयाँ कार्ययोजना साथमा अघि बढ्न लागेको बताउँदै त्यसमा सबै शिक्षालय र नागरिकको सहयोगको अपेक्षा गरे ।

कालिका मानवज्ञान माबिमा कक्षा ११ र १२ का शिक्षकहरुको लागि आयोजित तालिममा बोल्दै विद्यालयका प्रधानाध्यापक दिनेश थापाले शिक्षकहरु पुर्वयोजना र तयारीका साथ कक्षाकोठामा प्रवेश गरेमा मात्र शिक्षण प्रभावकारी हुने भएकोले शैक्षिक सत्रको शुरुमा गुणस्तर अभिवृद्धि तालिम आयोजना गरेको बताए । उनले शैक्षिक सुचकमा मात्र नभएर असल अभ्यासमा समेत कालिका मानवज्ञान मावि नेपालमै प्रथम हुन सकेको जानकारी दिदै यी असल अभ्यासहरु सबै विद्यालयमा हस्तान्तरण गर्न आफुहरु तयार रहेको प्रतिबद्धता ब्यक्त गरे ।

विद्यालय ब्यवस्थापन समितिका अध्यक्ष नित्यानन्द ज्ञवालीले विद्यालयलाई अब्बल बनाउन अभिभावकको चासो, विद्यालय प्रशासनको ठोस यिजना र शिक्षकको मेहनतले मुख्य भुमिका खेल्ने भएकोले यी सबै कुरालाई प्रेरित गर्न स्थानीय सरकारले दीर्घकालीन योजनाका साथ अघि बढ्नुपर्ने बताए ।

विद्यालयमा हुने ३ दिने तालिममा वार्षिक योजना निर्माण र उप्रेरणा सम्बन्धमा विभिन्न प्रशिक्षकहरुले प्रशिक्षण दिने विद्यालयले जनाएको छ ।