खोज

बुटवल, २६ असार ।   रोटरी क्लब अफ रुपन्देहीले रोटरी सामाजिक पत्रकारिता पुरस्कार–२०२२ बाट पत्रकार दिपक घिमिरेलाई पुरस्कृत गरेको छ । मंगलबार आयोजित क्लबको १२ औं पदस्थापन तथा वर्ष २०२२३÷२४ को धन्यवाद ज्ञापन कार्यक्रममा उक्त सम्मान तथा पुरस्कार प्रदान गरिएको हो ।

पत्रकारिताको माध्यमबाट सामाजिक क्षेत्रमा कलम चलाई योगदान पुर्याएको भन्दै उनलाई नगद ११ हजार १ सय ११ रुपैंयासहित सम्मान पत्र र दोसल्लाले पुरस्कृत तथा सम्मान गरिएको हो । एक कार्यक्रमका बिच डिष्ट्रिक्ट गर्भनर नोमिनी बिनोद कोइराला र पुरस्कारका संस्थापक तथा क्लबका पूर्व अध्यक्ष गौतम भुसाल, क्लबका अध्यक्ष हरि लम्सालले संयुक्त रुपमा सम्मान तथा पुरस्कार प्रदान गरेका हुन् ।

क्लबका पूर्व अध्यक्ष गौतम भुसालले आफ्ना स्वर्गीय हजुर बुवा केशवराज एवम् हजुरआमा हिमादेवी भुसालको स्मृतिमा सो पुरस्कारको स्थापना गरेका हुन । पुरस्कार हरेक वर्ष रुपन्देहीलाई कार्य क्षेत्र बनाएर सामाजिक क्षेत्रमा कलम चलाउने एक जना पत्रकारलाई दिइँदै आएको उनले बताए । गत वर्ष उक्त पुरस्कार पत्रकार स्व. एन.बी. कंडेलले प्राप्त गरेका थिए । यस वर्ष सम्मानित तथा पुरस्कृत घिमिरे भैरहवामा रहेर लामो समयदेखि सञ्चार क्षेत्रमा कार्यरत छन् । उनी खबरपात्रो डटकमका सम्पादक हुन् ।

कार्यक्रममा डिष्ट्रिक्ट गर्भनर नोमिनी बिनोद कोइरालाले क्लबलाई सामाजिक क्रियाकलापमा थप सक्रिय भएर काम गर्न सुझाब दिए । यसैबीच पदस्थापनको अवसरमा निवर्तमान अध्यक्ष ऋषिराम भण्डारीले आफ्नो कार्यकाल वर्ष २०२२÷२३ मा गरेका क्रियाकलापहरुको बारेमा जानकारी गराएका थिए । कार्यक्रममा क्लबको डाइरेक्टरी प्रकाशनसमेत गरिएको थियो । सामाजिक क्रियाकलापहरुमा सक्रिय रहेको क्लबले आफ्ना सदस्यका परिवारबाट एसईई परीक्षा उत्तीर्ण गरेका विद्यार्थीलाई सम्मान गरिएको थियो । यसैगरी क्लवमा नयाँ सदस्यका रुपमा प्रवेश गरेका ६ जना नयाँ सदस्यलाई पिन हस्तान्तरण गरिएको थियो ।

कार्यक्रममा एजी कृष्ण शर्मा, डिष्ट्रिक पब्लिक इमेज चेयर पर्सन राजकुमार गुप्ता, रोटरी डिस्ट्रिक ट्रेनर राजेन्द्र लम्साल, रोटरी क्लब अफ बुटवलका निवर्तमान अध्यक्ष बोनिन पिया, क्लबका एजी राजुदेवी खनालले सामाजिक क्षेत्रमा रोटरीको योगदानको बारेमा प्रकाश पारेका थिए ।