खोज

बुटवल, २६ असार  बुटवलमा जारी तेस्रो रुपन्देही कप खुला सेभेन ए साईड फुटबल प्रतियोगितामा फुलबारी गाईज (सेतो), नवशान्ति एफसी, सैनिक एफसी र ब्रदर्श एफसी अन्तिम चारमा स्थान बनाएको छ ।

फुलबारी गाईज बुटवलको आयोजना तथा रानीगंजा युवा क्लबको सहआयोजनामा रानीगंजा खेलमैदानमा मंगलबार दुई वटा सेमीफाईनल खेलहरु हुने आयोजक क्लबका अध्यक्ष अर्जुन गुरुङले बताए । पहिलो सेमीफाईनल आयोजक फुलबारी गाईज र नवशान्ति एफसी तथा दोस्रो सेमीफाइनल ब्रदर्श एफसी र सैनिक एफसीका बिचमा हुने उनले बताए ।

यसअघि भएको क्वाटरफाइनल खेलमा दोभान एफसीलाई सडेन डेथमा ५—४ गोलले पराजित गर्दै आयोजक फुलबारी गाईज (सेतो) समुह ‘बि’ बाट अन्तिम चारमा स्थान बनाएको हो । खेलमा आयोजक फुलबारीका सृजन श्रेष्ठ म्यान अफ दी म्याचबाट पुरस्कृत भए । समुह ‘डि’ बाट झरना स्र्पोटस क्लबलाई पेनाल्टी शुटआउटमा ३–१ गोलले पराजित गर्दै नवशान्ति अन्तिम चारमा स्थान बनायो ।

यसैगरि समुह ‘ए’ को खेलमा सिद्धार्थ एफसीलाई २—० गोलले पराजित गर्दै सैनिक एफसी अन्तिम चारमा स्थान बनाएको हो । सैनिकको जितमा प्रिन्स गुरुङ र निशान न्यौपानेले गोल गरे । खेलमा म्यान अफ दी म्याच सैनिकका सुदिप केसी भए । यसैगरि समुह ‘सी’ बाट ब्रदर्श एफसीले नवयुवा एफसीलाई पेनाल्टी शुटआउटमा ३—२ गोलले पराजित गर्दै अन्तिम चारमा स्थान बनायो ।