खोज

बुटवल, २२ असार  प्रथम स्कलर्स होम एसइई कप फुटसल प्रतियोगिता २०८० को उपाधि आयोजक स्कलर्स होम एकेडेमीले चुमेको छ । लुम्बिनी फुटसल एरिनामा शुक्रबार भएको फाईनल खेलमा मणिग्राम मेड्रिडलाई २–१ गोलले पराजित गर्दै आयोजक स्कलर्स होम एकेडेमीले उपाधि चुमेको हो । स्कलर्सले उपाधिसंगै नगद १० हजार रुपैया, कप, मेडल, प्रमाणपत्रबाट पुरस्कृत भयो ।

उपविजेता मणिग्राम मेड्रिड नगद ५ हजार, कप, मेडल, प्रमाणपत्रमा चित्त बुझायो । स्कलर्सको जितमा आपित गुरुङले २ गोल गरे । मणिग्राम मेड्रिडलाई जनक ढकालले सान्त्वना गोल गरे । प्रतियोगितामा स्कलर्सका आपित गुरुङ हाई स्कोरर, स्कलर्स होमका किस्मत क्षेत्री बेष्ट गोलकिपर, मणिग्राम मेड्रिडका जनक ढकाल उत्कृष्ट खेलाडीबाट पुरस्कृत भए ।

एसईई परिक्षा दिएर बसेका विद्यार्थीहरुको खेल प्रतिभा प्रस्फुटनको उदेश्यका साथ आयोजना गरिएको प्रतियोगिताको एक समारोहका बिच विद्यालयका प्राचार्य बाबुराम बन्जाडे, खेल संयोजक लोकप्रसाद भण्डारी (राजु), फुटबल खेलका प्रशिक्षक याम गुरुङ, खेलप्रेमी गोपाल प्रधानले विजेता, उपविजेता तथा उत्कृष्ट खेलाडीहरुलाई पुरस्कार बितरण गरे ।

विद्यालयका प्राचार्य बाबुराम बन्जाडेले शैक्षिकसंगै बालबालिकाको प्रतिभा प्रस्फुटनका धेरै क्रियाकलापमा विद्यालय अगाडी रहेको दाबी गरे ।
प्रतियोगितामा १६ टिमले उपाधिका लागि प्रतिस्प्रर्धा गरेको खेल संयोजक लोकप्रसाद भण्डारी (राजु) ले बताए । स्कलर्स होम एकेडेमीबाट फुटबल शुुरु गरेर राष्ट्रिय टिमबाट साग प्रतियोगितामा स्वर्ण पदक विजेता खेलाडीहरु नितेन थापा र रेजिन सुब्बासहित धेरै उमेर समुहा खेलाडी उत्पादन गर्न सफल भएको छ ।