खोज

चन्द्रौटा (कपिलवस्तु), २० असार ।

स्थानीय तहमै पशु जाँच प्रयोगशाला स्थापना हुने भएको छ । कृषि तथा पशुपन्छी विकास मन्त्रालयले आगामी आर्थिक बर्ष २०८०÷०८१ मा बजेट नै विनियोजन गरेर उक्त कामको थालनी गरेको हो ।

आगामी आवमा देशभरका १ सय ६१ पलिकामा पशु जाँच प्रयोगशाला स्थापनाका लागि बजेट विनियोजन भएको पशु चिकित्सकसमेत रहेका कृषि तथा पशुपन्छी विकास मन्त्री डा. बेदुराम भुसालका नीजि सचिवालयका पूर्ण बुढाले बताए ।

पशु चिकित्सक बुढाका अनुसार देशका ७ प्रदेशका १४ जिल्लामा पशु जाँच प्रयोगशाला स्थापना हुनेछ । जिल्लाका सबै पालिकामा यसका लागि ६ लाखका दरले मन्त्रालयले बजेट विनियोजन गरेर पठाएको बुढाले जनाए ।

आगामी ३ बर्षमा देशका ७ सय ५३ ओटै पालिकामा प्रयोगशाला स्थापना गर्ने तयारी मन्त्रालयको छ । आगामी आर्थिक बर्षमा मन्त्रालयले पहिलो चरण अन्तर्गत कोशी प्रदेशको इलाम र सुनसरी, मधेस प्रदेशको रौतहट र सर्लाही, बागमति प्रदेशको काभ्रेपलाञ्चोक र नुवाकोट, गण्डकी प्रदेशको तनहुँ र पर्वत, लुम्बिनी प्रदेशको कपिलवस्तु र अर्घाखाँची, कर्णाली प्रदेशको दैलेख र सुर्खेत, सुदुरपश्चिम प्रदेशको बैतडी र कन्चनपुर जिल्लाका सबै पालिका समेटिएका छन् ।

कृषि तथा पशुपन्छी विकास मन्त्री भुसालले पशुधनको संरक्षण गरी पशुजन्य पदार्थको उत्पादनमा सहयोग गर्ने बताए । साथै पशु स्वास्थ्य सुरक्षामा समेत यसले सघाउ पु¥याउने उनको विश्वास छ । अहिले प्रयोगशालाको अभावमा अधिकांश पशुपालक किसानले अनुमानको भरमा पशुको औषधि उपचार गर्दै आएका छन् ।

‘सरकारले नौलो प्रयोगको रुपमा हरेक पालिकामा प्रयोगशाला स्थापना गर्न लागेको छ । पशुका दुध, गोवर, पिसाव र रगतबाट देखिने रोगको निराकरणमा यसले भूमिका खेल्ने विश्वास छ । आधारभूत तहको जाँचबाट किसानले यसबाट मनग्य लाभ लिन सक्नेछन्झ ः मन्त्री भुसालले भने ।

हाल स्थानीय तहहरुमा पशुको आधारभूत चेकजाँच हुने प्रयोगशाला छैन् । जसले गर्दा किसानले बर्षेनी पशुपालनमा घाटा व्यहोर्न परिरहेको छ । पशुमा देखिने सामान्य रोकको जाँच हुन नसक्दा अन्धाधुन्ध औषधि चलाउने प्रवृत्ति छ । अब यो प्रयोशाला निर्माण पश्चात त्यो समस्याको अन्त्य हुने मन्त्री भुसालको विश्वास छ ।

पालिकाले पशु जाँच प्रयोगशालाका लागि चाहिने उपकरण आफै खरिद गर्न सक्नेछन् । पालिकाका कृषि तथा पशु विकास शाखा मार्फत यसको काम हुने जनाइएको छ ।