खोज

बर्दघाट, १९ असार ।

बर्दघाट बजारमा आगलागी हुँदा लाखौँको क्षति भएको छ । मुख्य बजारमा रहेको आशिष डिजिटल फोटो स्टुडियोमा मँगलबार दिउँसो आगलागी हुँदा स्टुडियो पूर्ण रुपमा जलेर नष्ट भएको छ भने अन्य तीनवटा पसलमा क्षति पुगेको छ ।

बर्दघाट नगरपालिका वडा नम्बर ४ दाउन्ने देवी मार्गमा रहेको डिजिटल फोटो स्टुडियोमा दिउँसो खाजा बनाउने क्रममा ग्यास लिक भइ आगो लागेको थियो । तत्काल बर्दघाट नगरपालिकाको दमकलको सहायतामा आगलागी नियन्त्रणमा लिइए पनि आगलागी सुरु भएको पसल भने पूर्ण रुपमा जलेर नष्ट भएको थियो ।

आगलागीबाट स्टुडियोको करिव ८० हजार नगद, करिव ३ तोला सुन, कम्प्युटर २ थान, प्रिन्टर ३ थान, फोटोकपी मेशिन १ थान, डिएसएलआर क्यामेर ३ थान सँगै गिफ्टका सामान जलेर नष्ट भएको सँचालक शिव चौधरीले बताए । आगो निभाउने क्रममा पसल सँचालक चौधरीको अनुहारमा आगोले पोले पनि अन्य मानवीय क्षति भने भएको छैन ।
स्टुडियो सँगै रहेको पर्वत युनिक फेन्सी पसल, रविन फार्मेसी र जे.के सैलुनमा आगलागीबाट आशिक क्षति भएको छ ।

आगलागी हुनासाथ बर्दघाट नगरपालिकाको दमकल, इलाका प्रहरी कार्यालय बर्दघाट, सशस्त्र प्रहरी सिमा सुरक्षा शिक्षालयका प्रहरी र रामग्राम नगरपालिकाको दमकल सहित स्थानीयले आगो नियन्त्रणमा लिएका थिए । आगलागीबाट तीनवटा पसल र पसल रहेको घरमा गरी करिव ३५ लाख रुपैयाँको क्षति भएको इलाका प्रहरी कार्यालय बर्दघाटका प्रहरी निरिक्षक विरेन्द्र केसीले जानकारी दिए ।